Կալանավորված սարիթաղցիների ազգականները շարունակում են բողոքել
Ցուցարարները պնդում են, թե անցած շաբաթ Երևանի դատախազ Ռաֆֆկ Ասլանյանը իրենց զգուշացրել է՝ լռեք, որպեսզի ձեր կալավորված հարազատների գործն ավելի չբարդանա:
«Դժգոհ ենք իրա պատասխանից․․․ Դա պատասխան չէր՝ եթե դուք ցույցը շարունակեք նախագահականում, ձեր տղաների համար վատ կլինի, էդ գործին: Սրանից վատ չեմ կարծում, որ մեր տղաների համար կլինի», - «Ազատության» հետ զրույցում ասաց ցույցի մասնակիցներից մեկը:
Ռաֆֆի Ասլանյանը, չձայնագրվելու պայմանով, «Ազատությանը» փոխանցեց․ - «Որևէ զգուշացում չի եղել․ ընդամենը զրուցել ու պարզաբանել ենք դատական նիստերի դահլիճում իրենց պահվածի հարցը: Ցույցերի դադարեցման հարց չի եղել: Ես ասել եմ՝ զգույշ եղեք, դատական նիստերի ընթացքում ձեռնպահ մնացեք ոստիկանների ու մեղադրողի հասցեին մեղադրանքներ հնչեցնելուց: Ես միայն առաջարկել եմ նրանց դատական նիստերի ընթացքում իրացնել իրենց օրինական իրավունքն ու սադրանքներ չհրահրել»:
Երևանի Պարեկապահակային գնդի գրավման օրերին ոստիկանների ու սարիթաղցիների միջև տեղի ունեցած բախումներից հետո կալանավորվածների հարազատները շարունակում են պնդել, որ իրենց հարազատները հուլիսի 19-ին փողոց էին դուրս եկել սոցիալական պահանջներով: Նախագահի աշխատակազմից նրանց պարբերաբար պատասխանում են, թե նախագահին ուղղված նամակն ուղարկվել է դատախազություն, կամ որ դատական համակարգն անկախ է:
Սարիթաղցիները, սակայն, պնդում են, թե դատարանները միայն Սերժ Սարգսյանին են ենթարկվում:
«Քանի որ մենք ապրում ենք Հայաստանում, երբեք նման բան չի կարա լինի, որ դատարանը անկախ լինի նախագահից․․․ Հիմա մենք նորից ենք եկել, մեր վերևներին, մեր նախագահին խնդրենք ազատ արձակել մեր տղաներին», - «Ազատության» հետ զրույցում ասաց կալանավորվածների հարազատներից մեկը:
Ցուցարարներն իրենց հետ բերել էին պաստառներ ու մինչև այսօր գործի նյութերին չկցված լուսանկարներ, որոնցում, իրենց պնդմամբ, երևում է, թե ինչպես են ոստիկանները ձեռքները տարել դեպի զենքը: Նրանք համոզված են, որ իրավապահներն են հրահրել վեճը:
«Նկարներում բոլոր ոստիկանները զենքերով են, դա բնական է: Բայց մինչև վեճը սկսելը զենքը դուրս են հանում: Մինչև վեճը, քաղաքացիական շորով, ավտոմատը ձեռին․․․ հենց տղաները մոտենում են, արագ նստում ա «Քեմրին» ու փախնում ա: Տեսանյութում համարները կա: Մեր տղաներից մեկը ասում ա՝ կյանքներս կերել եք, ճանապարհը բացեք, որպեսզի կարողանան մարդիկ օգտվեն: Ու արդեն տղաները գնում էին, գալիս ա Գագիկ Զոհրաբյանը՝ իրա դասակի, բերետավորների հետ․․․ Տեսեք, տղաներին հետ ա կանչում ու էդ բերետավորներից սկսվում ա ամբողջ կռիվը: Որի հետևանքով էսօր տղաները գտնվում են անազատության մեջ: Էս նկարները ոչ մի տեղ չի ցուցադրվում, ոչ մի տեղ չի ասվում սրանց մասին», - «Ազատությանն» ասաց կալանավորվածներից Հարություն Թորոսյանի եղբայրը:
Մեծերի հետ բողոքի ցույցի էին եկել նաև փոքրերը՝ կալանավորված Էդուարդ Զեյթունյանի անչափահաս դուստրն ու Հարություն Թորոսյանի եղբորորդին, որը «Ազատությանն» ասաց․ - «Ես եկել եմ, որպեսզի պահանջեմ, որ Սարի Թաղի դեպքերով կալանավորված անձանց ազատ արձակեն»:
Հուլիսի 19-ին սարի թաղում ոստիկանների հետ բախման մեջ մտած սարիթաղցիներից 9-ը ազատազրկված են ոստիկանի նկատմամբ բռնության մեղադրանքով, ինչի համար նրանց 5-10 տարվա ազատազրկում է սպառնում: Նրանցից վեցի գործն արդեն դատարանում է: