Ձկնաբույծները դժգոհ են պետության քաղաքականությունից
Հայանիստցի (Արարատի մարզ) Գուրգեն Մարտիրոսյանի ձկնաբուծարանը արդեն կես տարի է՝ դատարկ է։ Ձկնաբույծի միակ ցանկությունը տնտեսությունն օր առաջ վաճառելն է։
Բիզնեսը ոչ միայն շահույթ չբերեց, այլ նաև վարկերի և տոկոսների տակ ընկնելու պատճառ դարձավ։
«Ժամանակին ընտանիք էր կերակրում էս տնտեսությունը, էդպես կամաց-կամաց կերը թանկացավ, ջուրը թանկացավ, ու ըտենց էսօր մի հատիկ էլ ա ձուկ չունեմ», - պատմում է նա:
Տնտեսական լուրջ խնդրի առաջ կանգնած Մարտիրոսյանն ասում է՝ իր պես շատերն են նման իրավիճակի առաջ կանգնել։ Դժգոհում է՝ պետության քաղաքականությունը ոլորտում հանգեցնում է փոքր ու միջին ձեռնարկությունների վերացմանը և մեծերի էլ ավելի խոշորացմանը։
«Չկա պետական աջակցություն, ոչ մի բան․․․ էդ մաքսային միություն ասածն ուրախացանք, ասացինք՝ երևի կարտահանվի մեծ շուկա, բայց սաղ էլ միֆ դուրս եկավ», - ասում է Գուրգեն Մարտիրոսյանը:
Ձկնաբույծը մոնոպոլիա է տեսնում թե՛ կերի ներկրման, թե՛ ձկան արտահանման և թե՛ տեղում իրացման հարցերում։
«Մարդիկ կան, դե օլիգարխներ կան, չգիտեմ, ես անուններ չեմ ուզում ասեմ․․․ բարձր պաշտոնյաներ կան՝ նրանք կարողանում են անել, հիմա ես ո՞վ եմ, սովորական մարդ, որ կարողանամ անել», - ասում է նա:
Եվրասիական տնտեսական միության հետ կապված սպասումները իրականություն չեն դարձել նաև «Հայ ձկնարտադրողների և ձկնարտահանողների միասնություն» հասարակական կազմակերպության նախագահ Արթուր Աթոյանի ուսումնասիրություններում։ Ասում է՝ Միությունը ոչ մի օգուտ չի տվել Հայաստանի ձկնաբուծությանը։ Ավելին՝ ԵՏՄ-ից ներկրված կերը թանկ է, ԵՏՄ շուկայում ձկան գինը՝ էժան։ Արդյունքում, ըստ ՀԿ-ի տվյալների, վերջին երեք տարիներին լուծարվել է մոտ 70 տնտեսություն։
«Արտադրության ծավալները նվազել են, սակայն պաշտոնական տվյալներով աճ է գրանցված։ Դա կամ կեղծ ցուցանիշներ են, կամ մենաշնորհացման գործընթաց է գնում ոլորտում, երբ փոքրերը կուլ են գնում մեծերին», - ասում է Աթոյանը:
Մինչդեռ բոլորովին հակառակ պատկերն է ներկայացնում գյուղատնտեսության նախարարությունը։ Ձկնաբուծության և մեղվաբուծության բաժնի պետ Տիգրան Ալեքսանյանն ասում է՝ 2015-2016 թվականներին 10-15 տնտեսություններ են փակվել, սակայն զուգահեռ նորերն են ստեղծվել և արտադրության ծավալներն աճել են։
Ըստ պաշտոնյայի՝ եթե նախկինում ԵՏՄ երկրներ արտահանման իրավունք ուներ շուրջ 29 ընկերություն, ապա այսօր արդեն շուրջ յոթանասունն ունի ձուկ և ձկնամթերք արտահանելու թույլտվություն։
«Բոլորի համար նույն պայմաններն են, բոլորը աշխատում են, մենք էլ աշխատում ենք բոլոր ձկնաբուծարանների հետ», - ասում է Ալեքսանյանը: