«Ո՛չ թալանին»-ը պահանջում է պատժել անօրինական գործողություններ կատարած ոստիկաններին
Հիշեցնենք, այսօր Ոստիկանությունը հայտարարեց, որ Երևանի Բաղրամյան պողոտայում և Ազատության հրապարակում հունիսի 23-ի ոստիկանական գործողությունների առնչությամբ ոստիկանապետ Վլադիմիր Գասպարյանը ինը ոստիկանի կարգապահական տույժի է ենթարկել։ Ոստիկանության մեկ ծառայողի պաշտոնը մեկ աստիճանով իջեցվել է, մեկը նկատողություն է ստացել, յոթն էլ՝ խիստ նկատողություն։
«Ոչ թալանին» նախաձեռնությունը պահանջում է «պատժել անօրինական գործողություններ կատարած ոստիկաններին և քաղաքացիական հագուստով այն մարդկանց, ովքեր ներկայանում էին որպես ոստիկան`ցուցաբերելով լկտի պահվածք և կատարելով անօրինական գործողություններ, ինչպես նաև պատժի ենթարկել հունիսի 23-ին և հուլիսի 6-ին դեպքի վայրում գտնվող ոստիկանության բարձրաստիճան հրամանատարական կազմին»։
Նախաձեռնությունը նաև պահանջում է հեռացնել նրանց համակարգից, այնուհետև գործ հարուցել նրանց նկատմամբ և այդ քայլով հաստատել, որ վերջիններս անօրինական քայլեր կատարելու համար հրաման չեն ստացել ոստիկանապետի կողմից:
«Նշված պահանջի կետերը չկատարելու պարագայում ամբողջ պատասխանատվությունը մնում է անձամբ Վովա Գասպարյանի վրա»,- ասված է հայտարարությունում։