«Հայաստանում և Ադրբեջանում սպասվող առաջիկա փոփոխությունները ԼՂ խնդրի հետ կապ չունեն»
Առաջիկա ապրիլին Հայաստանում սպասվող՝ պետական կառավարման համակարգի փոփոխություններից, իսկ Ադրբեջանում նախանշված արտահերթ նախագահական ընտրություններից հետո արդյո՞ք ղարաբաղյան բանակցությունները կակտիվանան: Պատասխանելով այս հարցին, փոխարտգործնախարար Շավարշ Քոչարյանն այսօր կարծիք հայտնեց, որ կարգավորման գործընթացում իրական առաջընթացի հասնելու համար անհրաժեշտ է կյանքի կոչել Վիեննայում և Սանկտ-Պետերբուրգում ձեռք բերված պայմանավորվածությունները: Հիշեցնենք՝ այդ պայմանավորվածություններով, մասնավորապես, նախատեսում են շփման գոտում վստահության ամրապնդման մեխանիզմների ստեղծում:
Ապրիլի 9-ին լրանում է նախագահ Սերժ Սարգսյանի պաշտոնավարման երկրորդ ժամկետը, և Հայաստանը պետք է անցում կատարի կառավարման խորհրդարանական համակարգի, որի պայմաններում գործադիր իշխանությունը գլխավորելու է վարչապետը: Ադրբեջանի նախագահ Իլհամ Ալիևն էլ երեք օր առաջ ստորագրեց մի հրամանագիր, ըստ որի, այս տարվա ապրիլի 11-ին նախագահական արտահերթ ընտրություններ են անցկացվելու:
Նախագահական հերթական ընտրություններն Ադրբեջանում պետք է տեղի ունենային այս տարվա աշնանը՝ հոկտեմբերի 17-ին: «Եթե մենք խոսում ենք բանակցային գործընթացում իրական առաջընթացի մասին, դա ենթադրում է, որ պետք է իրականացվեն այն միջոցառումները, որոնք նախատեսվել են Վիեննայի և Սանկտ Պետերբուրգի պայմանավորվածություններով: Բոլորի համար ակնհայտ է, որ առանց դրա, առանց վստահության մթնոլորտի, առաջ շարժվելը գրեթե անհնարին է»,- ասաց Շավարշ Քոչարյանը:
Փոխարտգործնախարարի խոսքով՝ ղարաբաղյան բանակցությունները չպետք է կապել Ադրբեջանում նախագահական ընտրությունները կես տարի շուտ անցկացնելու՝ Ալիևի որոշման հետ: Մինչդեռ, որոշ փորձագետներ կարծիք էին հայտնել, թե Ադրբեջանի ղեկավարը շտապում է արագորեն ավարտին հասցնել նախագահական ընտրությունները, որպեսզի արդեն այս ամառ ակտիվորեն զբաղվի ղարաբաղյան խնդրով:
Շավարշ Քոչարյանն այս առնչությամբ նկատեց․ «Չեմ կարծում, որ Ադրբեջանն այն երկիրն է, որի համար կարևոր են ընտրությունները: Այնտեղ ընտրությունների արդյունքը միշտ կանխորոշված է, այնպես որ՝ ես առաջին հերթին Ադրբեջանում ընտրություններն ավելի շուտ անցկացնելը կկապեի իրենց ներկլանային հարաբերությունների հետ: Իհարկե՝ հաշվի են առնվում նաև արտաքին գործոնները, և եթե կա իշխանության համար ներքին պայքար, ապա ցանկացած տեղեկատվություն այն մասին, որ այդ ներքին պայքարում հակառակ կողմը կարող է ունենալ որոշակի աջակցություն այլ պետությունների կողմից, բնական է՝ դա ևս կարող է ունենալ իր ազդեցությունը»,- ասաց Շավարշ Քոչարյանը:
Այսօր Երևան են ժամանում ԵԱՀԿ Մինսկի խմբի համանախագահներ Էնդրյու Շեֆերը (ԱՄՆ), Իգոր Պոպովը (Ռուսաստան) և Ստեֆան Վիսկոնտին (Ֆրանսիա): Նախատեսվում են նրանց հանդիպումները նախագահ Սերժ Սարգսյանի ու արտգործնախարար Էդվարդ Նալբանդյանի հետ: Համանախագահներն այցելելու են նաև Ստեփանակերտ՝ հանդիպելու տեղի իշխանության ներկայացուցիչներին: Երեկ Բաքվում Շեֆերը, Պոպովը և Վիսկոնտին հանդիպել էին Ադրբեջանի նախագահ Իլհամ Ալիևի հետ:
Այսօր Շավարշ Քոչարյանն ասաց, որ այդ հանդիպումների արդյունքներով կտարածվեն ինչպես կողմերի, այնպես էլ միջնորդների հայտարարությունները, ինչից հետո «կկարողանանք տալ համապատասխան մեկնաբանություններ»: Փոխարտգործնախարարն, այդուհանդերձ, խորհուրդ տվեց համեմատել առաջիկա հայտարարություններն ու արձանագրել՝ ինչ են ասել համանախագահները, ինչ է ասել Հայաստանը և ինչ է ասել Ադրբեջանը: