Դատարանը մերժեց «Սասնա ծռերի» անդամին «անհապաղ» ազատելու և հիվանդանոց տեղափոխելու պահանջը
Դատարանն այսօր մերժեց «Սասնա ծռեր» զինված խմբի անդամ Հովհաննես Հարությունյանին ազատ արձակելու միջնորդությունը, չնայած փաստաբանները պնդում էին, որ նրա կյանքին վտանգ է սպառնում: Ոստիկանության ՊՊԾ գնդի տարածքում ոտքի շրջանում հրազենային վնասվածք ստացած 30-ամյա Հարությունյանին, ըստ պաշտպան Հայարփի Սարգսյանի, անհապաղ պետք է հիվանդանոց տեղափոխել, քանի որ ՔԿՀ-ում բուժօգնություն չի ստանում:
Հովհաննես Հարությունյանը քայլում է հենակի օգնությամբ, նախորդ նիստին հենց ինքը դատարանին պատմեց, որ բժշկական օգնություն չի ստանում: «Բացի այն, որ առաջին օրը գնդակներ են հանել ոտքիս միջից, մինչև հիմա ոտքիս մեջ կան լիքը ասկոլկեք, ոտքս ձեռքիցս բարակ ա դարձել արդեն: Ու ես մի խցում եմ մնում, որը կարցեր ա՝ մետրուկես լենքն ա, չորս մետր երկարությունը, բետոն ա ու ոչ մի բան չկա: Չափից ավել հայրենասիրությունը նշանակում ա, որ պետք ա էդ մարդուն միանգամից ոչնչացնել»,- ասել էր Հովհաննես Հարությունյանը:
Նրան ազատ արձակելու պահանջով այսօր ներկայացված միջնորդությանը միացան գրեթե բոլոր փաստաբանները: Մուշեղ Շուշանյանի գնահատմամբ՝ Հարությունյանի նկատմամբ անմարդկային վերաբերմունք է դրսևորվում, «եթե ոչ խոշտանգում»: Փաստաբան Լուսինե Սահակյանը շարունակեց՝ Հովհաննես Հարությունյանը խնամակալի կարիք ունի, նա չի կարող ինքն իր մասին հոգ տանել, և այս մասով բողոքը Եվրոպական դատարանում կբավարարվի, քանի որ «ակնհայտ է՝ անձն ունի բուժման կարիք»: Պաշտպան Դավիթ Գյուրջյանն էլ դատավորին «Հաց բերող» Արթուր Սարգսյանի «ողբերգական նախադեպը» հիշեցրեց՝ հորդորելով սովորել սխալներից:
Մեղադրող դատախազն առարկեց, որ զինված խմբի անդամն ազատ արձակվի, ասում էր՝ փաստաբաններն ընդամենը ենթադրություններ են անում, թե նրա առողջական վիճակը կարող է վատթարանալ: «Եվ դրանով ինչ-որ տպավորություն ստեղծելու փորձը, կարծում եմ, էդքան էլ հաջողված չէր»,- ասաց մեղադրողը:
Այս միջնորդությունից բացի դատավոր Արթուր Օհանյանն այսօր մերժեց նաև «Սասնա ծռեր»-ի երեք վարույթները նորից միավորելու՝ փաստաբանների պահանջը: Դատավոր Արտուշ Գաբրիելյանն ամիսներ շարունակ չկարողանալով ավարտել դատավարության նախապատրաստական փուլը՝ որոշեց իր այլ գործընկերների հետ քննել գործը: Պաշտպանները տարակուսած են՝ նույն վկաներին ու տուժողներին երեք անգա՞մ են հարցաքննելու, հարց են տալիս նրանք ու արձանագրում՝ ամեն ինչ ձևական է: «Սա քաղաքական դատավարություն է, դատական ակտն էլ վաղուց կայացված է, մենք հիմա այստեղ ձև ենք թափում, բայց գոնե այդ ձև թափելն էլ Քրեական դատավարության օրենսգրքին համապատասխան լինի»,- ասաց Լուսինե Սահակյանը:
Դատավարությունը կշարունակվի երկու շաբաթից: Այս գործով անցնող խմբի տարբեր անդամներ մեղադրվում են սպանության, ապօրինի զենք ձեռք բերելու, դրա գործադրմամբ շենք գրավելու, գույք փչացնելու, պատանդ պահելու, նրանց ազատելու պայմանով պետությանը գործողություններ հարկադրելու մեջ: