Հայ կինոյի ոլորտում լուրջ փոփոխություններ են սպասվում
Հուլիսի 25-ին մշակույթի նախարար Արմեն Ամիրյանի հրամանով Հայաստանի ազգային կինոկենտրոնի տնօրեն Գևորգ Գևորգյանը ազատվել է պաշտոնից: Նախարարի մեկ այլ հրամանով նույն օրն Ազգային կինոկենտրոնի տնօրենի ժամանակավոր պաշտոնակատար է նշանակվել Շուշանիկ Միրզախանյանը՝ ազատվելով փաստավավերագրական ֆիլմերի «Հայկ» կինոստուդիայի տնօրենի պաշտոնից:
Փաստորեն՝ Ազգային կինոկենտրոնն արդեն նոր ղեկավարություն ունի՝ ի դեմս Շուշանիկ Միրզախանյանի և նրա հրամանով կինոկենտրոնի գեղարվեստական ղեկավար-ֆիլմ հանձնակատար նշանակված կինոպրոդյուսեր Արսեն Բաղդասարյանի:
Այսօր մշակույթի նախարարությունում հրավիրված մամլո ասուլիսին նախարար Արմեն Ամիրյանը ներկայացրեց այն ակնկալիքը, որն ունեն՝ ստեղծելով ֆիլմ-հանձնակատարի ինստիտուտը հայկական կինոյի ոլորտում: «Այդ ինստիտուտի ստեղծմամբ, նաև օրենքով ու մեր մշակած հայեցակարգով, պետք է ստեղծենք լավագույն պայմաններ՝ արտասահմանյան կինոարտադրողների համար: Բայ սա դեռ քիչ է, որովհետև Հայաստանում պետք է ստեղծել նաև համապատասխան կրթական համակարգ: Եթե մենք այսօր ունենք լավ մասնագետներ, նրանք առնվազն չեն տիրապետում որևէ օտար լեզվի, արևմտյան կինոարտադրության համակարգերին: Ուրեմն պետք է ստեղծել կրթական համակարգ:
Այդ համակարգից հետո երրորդ խնդիրն է գալիս, Եթե Հայաստանում երկու լիամետրաժ ֆիլմ միաժամանակ մտնում է արտադրություն, Հայաստանում առկա տեխնիկական միջոցները չեն բավարարում երկու նման ֆիլմ նկարահանելուն: Մեր խնդիրն է նաև մասնավորին այնպիսի շահավետ պայմաններ առաջարկելը, որ Հայաստանում ստեղծվեն տեխնիկական նոր բազաներ, որպեսզի տարեկան գոնե 8-10 ֆիլմի արտադրություն կարողանանք սկսել»,- ասաց մշակույթի նախարարը:
Բացի այդ, ակնկալվում է, որ Ազգային կինոկենտրոնի նոր ղեկավարությունը բաց և թափանցիկ կդարձնի կինոկենտրոնին ներկայացվող կինոնախագծերի ընտրությունը, նաև նշեց նախարարն ու հավելեց․ «Անպայման այդ նախագծերի մեջ մենք պետք է հաշվի առնենք, որ սա այն ֆիլմն է, այն կինոնկարն է, որն ունենալու է ազգային արժեք, որը կարողանալու է մասնակցել փառատոների և շահելու է մրցանակներ և որը կարող է վաճառվել և ունենալ եկամուտ: Այս երեք կարևորագույն կոմպոնենտները հաշվի առնելով՝ մենք պետք է կարողանանք ֆիլմաջակցության արդար, թափանցիկ և բաց տարբերակով՝ ձեր աչքի առաջ, հասարակության աչքի առաջ ճիշտ բաշխում կատարել»:
«Ազատության» հարցին՝ ինքն անձամբ ի՞նչ քայլեր է ձեռնարկելու Ազգային կինոկենտրոնի գործունեության և առհասարակ՝ հայ կինոյի զարգացման համար, Շուշանիկ Միրզախանյանն ասաց․ «Առաջինը՝ մենք պետք է աշխատենք, ստեղծենք համաարտադրություններ: Պետք է միշտ լինեն ֆիլմեր՝ [ստեղծված] արտասահմանյան ընկերությունների հետ, որ ֆիլմն ունենա ճակատագիր: Հայաստանը պետք է ունենա դիստրիբյուտորական ընկերություն: Այդ ինստիտուտն այսօր մեզ մոտ գոյություն չունի, բայց դա աշխարհում ընդունված համակարգ է՝ արտադրողը ֆիլմը տալիս է դիստրիբյուտորին, որը զբաղվում է ֆիլմի ճակատագրով․ դա կլինի փառատոն, շուկաներում ներկայացնելը և այլն»:
Շուշանիկ Միրզախանյանի համոզմամբ՝ մեր կինոգործիչներն իրենք էլ պիտի ջանք թափեն իրենց ծրագրերն իրագործելու համար: Խոսքը հատկապես երիտասարդ կինոգործիչների մասին է: «Մեր երիտասարդ ռեժիսորները պետք է իրենք ինտերնետով փնտրեն․․․ փառք Աստծո, աշխարհն այսօր բաց է, իրենք էլ լեզուներին տիրապետում են: Իրենք էսօրվա ձևով պետք է մտածեն»:
Ազգային կինոկենտրոնի նորանշանակ գեղարվեստական ղեկավար-ֆիլմ հանձանակատար Արսեն Բաղդասարյանը ևս իր խոսքում կարևոր համարեց դիստրիբուցիայի խնդիրը: «Կինոարտադրողի նպատակն այն է, որ կինոն տարածվի ողջ աշխարհում և ճանաչվի: Եվ երբ դիստրիբուցիան չենք կարողանում իրականացնել, դա մեծ խնդիր է դառնում»,- ասաց Բաղդասարյանը: Ի դեպ, նա 8 տարեկանից բնակվել է Ամերիկայի Միացյալ Նահանգներում, հոգեբանի մասնագիտական կրթություն ունի:
Այսօրվա ասուլիսից հետո մեզ հետ ունեցած զրույցում Բաղդասարյանը նշում էր նաև, որ կինոյի բնագավառում համագործակցել է ամերիկյան մի շարք անվանի կինոռեժիսորների ու կինոստուդիաների հետ: Առաջիկայում, ամենայն հավանակությամբ, փաստավավերագրական ֆիլմերի «Հայկ» կինոստուդիան և Ազգային կինոկենտրոնը կմիավորվեն: