«Պարտադիր կուտակային կենսաթոշակային համակարգում ավելի քան 170 հազար մասնակից կա». Արտեմ Ասատրյան
«Պարտադիր կուտակային կենսաթոշակային համակարգում շատ լավ արդյունքներ ունենք», - այսօր «Ֆեյսբուքյան ասուլիս» հաղորդման ժամանակ ասաց աշխատանքի և սոցիալական հարցերի նախարար Արտեմ Ասատրյանը՝ նշելով, որ համակարգի ներդրման օրվանից ֆոնդերի կառավարիչների կողմից կատարված աշխատանքների արդյունքում 30 տոկոսից ավելի եկամտաբերություն կա։
«Այսօր մենք ունենք համակարգի ավելի քան 170 հազար մասնակից, որից 70 հազարն է պետական աշխատող, իսկ ավելի քան 100 հազարը մասնավոր՝ ոչ-պետական հատվածի աշխատողներն են։ Համակարգում կուտակված գումարները, եթե չեմ սխալվում, շուրջ 80 միլիարդ դրամի կարգի են։ Եվ շատ հետաքրքրող հարց մեր քաղաքացիներին, թե «արդյո՞ք այդ գումարները ներդրվում են տնտեսության մեջ, որքանո՞վ է ազդեցություն ունենում տնտեսության զարգացմանը», եթե չեմ սխալվում, 72 տոկոսը կամ դրանից ավելին ներդրված է Հայաստանի Հանրապետությունում տարբեր գործիքներում, դա բերում է նաև երկարաժամկետ փողերի, գումարի նվազեցման, իսկ մյուս գումարները նաև ներդրվում են դրսերում, որպեսզի հնարավոր լինի նաև այլ երկրներում, շատ հայտնի ֆիրմաների կողմից իրականացվող աշխատանքների արդյունքում եկամուտները բերել մեր մասնակիցներին բաշխելու», - ասաց նախարարը։
Նշենք, որ Պարտադիր կուտակային կենսաթոշակային փոփոխությունների մասին օրենքն ամբողջովին ուժի մեջ կմտնի 2018 թվականի հուլիսի 1-ից և կտարածվի 1974 թվականի հունվարի 1-ից ծնված աշխատող քաղաքացիների վրա։