Սեյրան Օհանյան. Հայաստանը դատապարտում է իր ռազմավարական գործընկերների դեմ ուղղված Թուրքիայի գործողությունները
Հայաստանը դատապարտում է իր ռազմավարական գործընկերների դեմ ուղղված Թուրքիայի գործողությունները: Այս մասին Երևանում Հունաստանի ազգային պաշտպանության նախարար Պանայոտիս Կամմենոսի հետ համատեղ մամուլի ասուլիսում հայտարարել է ՀՀ պաշտպանության նախարար Սեյրան Օհանյանը, պատասխանելով հարցին, թե հույն գործընկերոջ հետ հանդիպման ընթացքում քննարկվել են արդյոք Թուրքիայի գործողությունները և տարածաշրջանային հնարավոր զարգացումները:
Նրա խոսքով, հանդիպման ընթացքում քննարկվել է միջազգային և տարածաշրջանային հարցերի լայն շրջանակ, այդ թվում նաև իրավիճակը Հարավային Կովկասում և Մերձավոր Արևելքում, ինչպես նաև դրանց կարգավորման ուղիները: «Կասկած չկա, որ հարևանների հետ կապված պրոբլեմներն անհանգաստացնում են, ինչպես մեզ, այնպես էլ մեր ռազմավարական գործընկերներին: Միջազգային հանրության ուշադրությունը նույնպես սևեռված է այդ հարցի վրա, հատկապես եթե հաշվի առնենք, որ տարածաշրջանում կան երկրներ, ի դեմս Թուրքիայի, որոնք աջակցում են Իսլամական պետությանը, լուծելով համապատասխան խնդիրներ: Մենք դատապարտում ենք այդ ամենը, հատկապես նրա համար, որ ուղղված է մեր ռազմավարական գործընկերների դեմ: Դատապարտտում ենք նաև նրա համար, որ այդ ընդհատակյա գործողությունները թույլ չեն տալիս ամբողջովին լուծել այն խնդիրները, որոնք ուղղված են միջազգային ահաբեկչության դեմ պայքարին»,-ընդգծել է նախարարը:
Նախարարը գտնում է նաև, որ ոչ պատերազմական ժամանակաշրջանում հարևանները պետք է միմյանց նկատմամբ ցուցաբերեն հանդուրժողականություն, բոլոր խախտումների նկատմամբ, որոնք կարող են տեղի ունենալ զինված ուժերի նախապատրաստական փուլում, քանի որ սահմաները հստակ չեն գծված: «Ներկայումս Թուրքիան գրեթե ամեն օր խախտում է Հունաստանի օդային սահմանը, խախտում նաև Հայաստանի օդային սահմանները, ինչին մենք վերաբերվում ենք հանդուրժողականությամբ: Անկարան իրավունք չուներ կատարել այդ ոչ բարեկամական քայլը ռուսական ինքնաթիռի նկատմամբ, հատկապես օդաչունի նկատմամբ, դրանով խախտելով միջազգային իրավունքի բոլոր նորմերը»,-հայտարարել է Օհանյանը:
Հարցին, որ երբ Թուրքիան պրոբլեմներ է ունենում մեծ տերությունների հետ, միշտ տուժում են փոքր պետությունները, այդ թվում նաև Հայաստանը և Հունաստանը, և արդյո՞ք այդ երկրներն այսօր հաշվի կառնեն այդ փաստը, Օհանյանը հայտարարել է, որ ոչ ոք իրավունք չունի փոքր պետություններին կամ ազգերին պարտադրել իր կամքը: Նա նշել է, որ Հայաստանը և Հունաստանը շարունակում են համագործակցել պաշտպանության ոլորտում, համաձայն փոխծակցության պլանի, և մտադիր են այսուհետ էլ զարգացնել և խորացնել երկկողմ համագործակցությունը:
Իր հերթին, Հունաստանի պաշտպանության նախարարն ընդգծել է, որ միշտ չէ, որ հաղթում է նա, ով մեծ է և ուժեղ, այլ հաղթում է նա, ոմ կողմն է ճշմարտությունը: «Չնայած Հայաստանը փոքր պետություն է, բայց նրան հաջողվել է հասնել Հայոց ցեղասպանության ճանաչմանն աշխարհի տասնյակ խորհրդարանների կողմից, և դա այն պայմաներում, երբ թուրքական քարոզչությունն ակտիվորեն աշխատում էր»,-նշել է հույն նախարարը: Նա նաև ընդգծել է, որ Թուրքիան ամեն օր խախտում է Հունաստանի օդային տարածքը, շարունակում է օկուպացիայի տակ պահել հունական տարածքները, իսկ այժմ արդեն խախտում է միջազգային իրավունքը, Սիրիայի երկնքում խոցելով ՍՈւ-24 կործանիչը: «Պաշտոնական Անկարան չկարողացավ ապացուցել, որ ռուսական ինքնաթիտը խոցել է թուրքական տարածքում: Թուրքիայի գործողություններն ընդունելի չեն, հատկապես ընդունելի չէ այն, ինչ նրանք արեցին ՍՈՒ-24-ի օդաչունի հետ, որը միջազգային իրավունքով հանդիսանում էր ռազմագերի»,-նշել է հույն նախարարը: Նա հավելել է, որ տարածաշրջանում կա միայն մեկ պետոթյունը, որը մշտապես զբաղված է սադրանքներով, չի հարգում միջազգային իրավունքը, աջակցում է իսլամիստներին, ԻՊ-ին օգնում է իրացնել նավթը, իսկ հավաքված միջոցներն ուղղվում ահաբեկիչների կարիքներին:
Կամմենոսը գտնում է, որ եթե Թուրքիային հաջողվեր ապացուցել, որ ինքնաթիռը խոցվել է իր օդային տարածքում, ապա ուժի մեջ կմտներ ՆԱՏՕ-ի հետ պայմանագրի 5-րդ հոդվածը, որի համաձայն, ՆԱՏՕ-ի երկրներից մեկի վրա հարձակում գործած երկիրը համարվում է ՆԱՏՕ-ի բոլոր երկրների վրա հարձակում գործած երկիր, որից հետո կարող էին ընթանալ բոլորովին այլ գործընթացներ: «Մենք ռուսական կողմին օգնեցինք հավաքել բոլոր ապացույցները, որոնք վկայում են, որ ռուսական կործանիչը խոցվել է սիրիական տարածքի վրա»,-եզրափակել է հույն նախարարը: