Լևոն Զուրաբյանն անհամապատասխանություններ է հայտնաբերել արձանագրություններում և ԿԸՀ տվյալներում
ՀԱԿ խմբակցության ղեկավար Լևոն Զուրաբյանը ևս մեկ հանցագործության մասին հաղորդում է ուղարկել գլխավոր դատախազ Գևորգ Կոստանյանին, որն առնչվում է ընտրական հանձնաժողովների ամփոփիչ արձանագրությունների կեղծմանը:
Զուրաբյանը նշել է, որ «Ոչի» քարոզչական շտաբը հայտնաբերել է տարբեր ընտրատեղամասերի 5 արձանագրությունների կեղծում: Մասնավորապես, «Ոչի» վստահված անձի արձանագրության տվյալներով, 5/38 ընտրատեղամասում սահմանադրական բարեփոխումների օգտին քվեարկել է 343 ընտրող, դեմ` 421-ը, սակայն ԿԸՀ տվյալներով նույն ընտրատեղմաասում բարեփոխումների օգտնի քվեարկել է 1155 մարդ, իսկ դեմ` 92-ը: Զուրաբյանի ներկայացրած տվյլաներով նույն պատկերն է 11/22 ընտրատեղամասում (ըստ արձանագրության` 156 կողմ, 426 դեմ,ԿԸՀ տվյալներով` 418 կողմ, 165 դեմ, 15/18 ընտրատեղամասում (ըստ արձանագրության` 430 կողմ, 470 դեմ, ԿԸՀ տվյալներով` 770 կողմ, 132 դեմ), 23/42 ընտրատեղամասում (ըստ արձանագրության` 450 կողմ, 402 դեմ, ԿԸՀ տվյալներով 750 կողմ, 112 դեմ), 28/35 ընտրատեղամասում (ըստ արձանագրության` 301 կողմ, 304 դեմ, ԿԸՀ տվյալներով 605 կողմ, 304 դեմ):
«Այս տվյալները վկայում են, որ ԿԸՀ հրապարակած արդյունքներն ընդհանուր ոչինչ չունեն քվեարկության իրական պատկերի հետ, և կեղծարարության ծավալներն ազդել են քվեարկության արդյունքի վրա», - նշել է Զուրաբյանը: Նա ընդսմին հավելել է, որ անկախ այն բանից, թե արդյոք ԿԸՀ անդամներն են թվեր «նկարել» արձանագրությունների վրա, թե նրանց ներկայացրել են կեղծված արձանագրություններ, նրանք պետք է պատասխանատվության ենթարկվեն: Ընդ որում ՀԱԿ խմբակցության ղեկավարը հայտարարել է, որ առաջիկայում դատախազությունն ավելի քան 100 հաղորդում կստանա հանրաքվեի ընթացքում կատարված հանցագործությունների մասին: «Մենք խստագույնս պատժելու ենք կեղծարարներին և ձգտելու ենք հասնել դրանց կալանավորման», - նշել է Զուրաբյանը:
Նա նաև հավելել է, որ «Ոչի» ճակատը չի հրաժարվել հանրաքվեի արդյունքները Սահմանադրական դատարանում բողոքարկելու մտադրությունից: Նրա հավաստմամբ, արդեն 17 պատգամավոր միացել է այդ նախաձեռնությանը: Ընդ որում, Զուրաբյանը բարեփոխումների կողմնակից պատգամավորներին նույնպես կոչ է արել միանալ հայտարարությանը: «Եթե նրանք վստահ են, որ հանրաքվեն անցել է թափանցիկ, պետք է շահագրգռված լինեն խախտումների վերաբերյալ բոլոր ահազանգերի համակողմանի ուսումնասիրմանը», - եզրափակել է նա:
Հիշեցնենք, որ հանրաքվեի արդյունքները վիճարկելու հարցով Սահմանադրական դատարան դիմելու համար անհրաժեշտ է 27 պատգամավորի ստորագրություն` մինչև դեկտեմբերի 18-ը: