Նիկոլ Փաշինյան. Պաշտպանության նախարարն իր ծառայությունն անց է կացրել Սերժ Սարգսյանի ընդունարանում
Արմինֆո. «Պաշտպանության նախկին նախարար Սեյրան Օհանյան կնոջ՝ Ռուզաննա Խաչատրյանի ֆեյսբուքյան գրառումից հետո պաշտպանության նախարար Վիգեն Սարգսյանը պետք է պարզաբանումներ տա, թե ինչու 1992 թ. չի զորակոչվել բանակ և չի ծառայել»,- Ազգային ժողովում ճեպազրույցի ժամանակ հայտարարել է «Ելք» խմբակցության ղեկավար Նիկոլ Փաշինյանը:
Նա նշել է, որ չնայած այն բանին, որ գրառման մեջ Խաչատրյանը չի մատնանշում բարձրաստիճան պաշտոնյայի անունը, ով խուսափել է ծառայությունից՝ նա ակնարկում է այն փաստը, որ այդ պաշտոնյան պաշտպանության նախարար Վիգեն Սարգսյանն է: Փաշինյանն ընդգծել է նաև, որ Վիգեն Սարգսյանը 2002-2003 թթ. «ռեֆերենտ» է ծառայել այդ ժամանակ պաշտպանության նախարար Սերժ Սարգսյանի աշխատակազմում:
Հիշեցնենք, որ Ռուզաննա Խաչատրյանը, մասնավորապես, գրել էր. «Ակամա հիշողություններս ինձ մոտ 18 տարի հետ են տանում. ես աշխատում էի Էրեբունի բժշկական կենտրոնի ֆրանսիական ատամնաբուժարանում և բժշկել եմ այդ մարդուն, անձամբ ճանաչում եմ մոտ 25 տարի: Հիշում եմ՝ ինչպես էր այն ժամանակ խուսափում բանակից, հիշում եմ՝ ինչպես էր ռազմական ոստիկանությունը փնտրում իրեն. հայրը դիմել էր նրա ընկերուհուն, որը զինվորական բարձրաստիճան պաշտոնյայի խորհրդական էր, որպեսզի վերջինս ոստիկանական հետապնդումից ազատի որդուն: Այդ ժամանակ ես բուժում էի նաև այդ աղջկա ատամները և հիշում եմ՝ ինչպես հոգատար ընկերուհին, եթե չեմ սխալվում, այն ժամանակ պաշտպանության փոխնախարար Շիրխանյանի օգնությամբ փրկեց նրան պատժից... Եվ այսօր նա՝ իբրև մեծ «փիլիսոփաե, իբրև մեծ «ուսուցիչե, մատը տարբեր ամբիոններից թափահարելով, փորձում է դաստիարակչական խորհուրդներ և խրատներ տալ մատաղ սերնդին»: Պաշտպանության նախարարությունն այսօր արձագանքել է Ռուզաննա Խաչատրյանի աղմկահարույց գրառմանը: ՊՆ մամուլի քարտուղար Արծրուն Հովհաննիսյանը, մասնավորապես, հայտարարել է. «Հարգելի գործընկերներ Ռուզաննա Խաչատրյանի գրառման վերաբերյալ ձեր կողմից ուղարկվող հարցումների հասցեատերը այդ գրառման հեղինակն է: Այդպիսին է նաև ՀՀ քաղաքացիական օրենսգրքի «զրպարտությունե և «վիրավորանքե ինչպես նաև ՀՀ քրեական օրենսգրքի «սուտ մատնությունե հոդվածների տրամաբանությունը: Անկախ այդ պարզաբանումներից, ՀՀ պաշտպանության նախարարությունը պաշտոնապես հայտարարում է. 1. Հայաստանի Հանրապետության պաշտպանության նախարար Վիգեն Սարգսյանը երբևէ չի խուսափել զինվորական ծառայությունից: 18 տարեկանից ի վեր (ինչպես և մինչ այդ` կցագրման փուլում) չի եղել զինկոմիսարիատի մեկ ծանուցում, որով նախատեսված օրն ու ժամին չներկայանա առաջին իսկ կանչով: Չի եղել մի զորակոչ, որի ժամանակ զորակոչի ենթակա լինելով խուսափեր այդ պարտավորությունից: Պաշտպանության նախարարը երբևէ չի ունեցել և չունի որևէ առողջական սահմանափակում, զորակոչի տարկետման կամ ազատման առողջական որևէ հիմք: 2. Նախարար Սարգսյանը երբևէ չի եղել հետախուզման մեջ, նրա նկատմամբ ռազմական ոստիկանության կամ իրավապահ որևէ այլ մարմինների կողմից չի իրականացվել որևէ գործողություն, նախաքննական, հետախուզական, քննչական որևէ ընթացակարգ: 3. ՀՀ օրենսդրությամբ սահմանված կարգով Վիգեն Ալեքսանդրի Սարգսյանը կատարել է հայրենիքի պաշտպանության իր սահմանադրական պարտքը` ծառայելով ՀՀ Զինված ուժերում որպես սպա: Զորացրվել է պահեստազոր՝ ավագ լեյտենանտ զինվորական կոչումով»: