Кузбасста татар халкының бөек шагыйре Муса Җәлилне искә алдылар
(Казан, 16 февраль, «Татар-информ»). Кузбасс төбәгенең Ленинск-Кузнецк шәһәрендә Муса Җәлилнең тууына 116 ел тулу уңаеннан әдәбият-сәнгать кичәсе үтте.
Чараны оештыручылар – шәһәрнең татар җәмәгатьчелеге. Бу хакта Бөтендөнья татар конгрессы хәбәр итә.
Татар халкының герой-шагыйре Муса Җәлилнең 116 еллыгына багышланган бу кичәдә Новокузнецк шәһәренең «Ак калфак-Нур» хатын-кызлар оешмасы, Междуреченск һәм Осинники шәһәрләренең татар оешмалары вәкилләре катнашты. Кунакларга шагыйрьнең шигырьләрен укыдылар.
Соңыннан чарада катнашучылар «Мөхәррәм» мәчетендә булдылар, анда мәчетнең имам-хатыйбы Дамир хәзрәт һәлак булган җәлилчеләр рухына Коръән сүрәләре укыды.
Әдәби кичә катнашучылар үзләре әзерләп алып килгән милли ризыклар куелган чәй табыны белән тәмамланды.