Новосибирскда ўзбекистонлик олимпия чемпиони Лина Черязова оламдан ўтди
Ўзбекистон тарихида биринчи марта чанғи акробатикаси бўйича Олимпиада чемпиони бўлган Лина Черязова Россиянинг Новосибирск шаҳрида оламдан ўтди. У эндигина 50 ёшга кирганди.
Новосибирск шаҳар мэрияси Жисмоний тарбия ва спорт бошқармаси спортчининг узоқ давом этган хасталик ортидан вафот этганини билдирди.
Лина Черязова 1968 йилнинг 1 ноябрида Тошкентда таваллуд топганди. 1989 йили у фристайл бўйича Жаҳон кубогида СССР терма жамоаси таркибида иштирок этган. Совет Иттифоқи парчаланганидан сўнг Ўзбекистон номидан халқаро мусобақаларда қатнашган. Хусусан, 1994 йили Лиллеҳаммерда ўтган Олимпиадада ғолиб бўлиб, олтин медални қўлга киритган. Бу ўзбекистонлик спортчилар томонидан қишки Олимпиада ўйинларида қўлга киритилган ягона олтин медалдир.
Лина Черязова 90-йиллар охирларидан бери Россиянинг Новосибирск шаҳрида яшаб келаётганди.