Нижневартовск шәһәрендә төзелә торган мәчеткә ай куелды
(Казан, 4 сентябрь, «Татар-информ»). Нижневартовск шәһәрендә төзелә торган мәчетнең бишенче манарасына ай куелды. Мәчет 2002 елда төзелә башлаган иде. Ул чагында аны сафка бастыруда шундагы предприятиеләр ярдәм итә. Хәзер төзелеш шәһәрдә гомер итүче татарлар һәм башка милләт дин кардәшләребез ярдәмендә алып барыла.
Бөтендөнья татар конгрессы матбугат хезмәте хәбәр иткәнчә, бу чарада Нижневартовскида яшәүче милләттәшләр катнаша. Биредә 40 меңләп татар яши.
«Мирас» татар милли-мәдәни автономиясе рәисе Рафаэль Мөхәммәтҗанов сүзләренчә, мәчетнең беренче өлешен киләсе елга, Идел буе Болгар дәүләтендә Ислам дине кабул ителүнең 1100 еллыгына ачарга планлаштыралар.