«Саха» НКИХ Намнааҕы филиала 25 сылынан быыстапка туруорда
Намнааҕы П.И. Сивцев аатынан кыраайы үөрэтэр музейга умнуллубат үтүөкэн тэрээһин буолла. «Саха» НКИХ Намнааҕы филиала 25 сыллаах үбүлүөйүнэн «Нам TV дуораана» диэн быыстапканы үөрүүлээх быһыыга-майгыга аста. Истроияны сэгэтэн көрдөххө, 1991 сыллаахха балаҕан ыйын 11 күнүгэр Саха АССР үрдүкү Сэбиэтин уурааҕынан оройуоннааҕы бастакы видеостудия тэриллибит. Бастакы дириэктэринэн Иннокентий Захарович Кривошапкин ананан үлэни уоттаахтык-күөстээхтик саҕалаабыт. Бастаан утаа общественноһы, тэрилтэлэри кытта ыкса сибээһи туппуттар. Бастакы сылларыгар үлэлиир тэриллэригэр кыһалҕалары көрсүбүттэригэр «Быйаҥ» акционернай тэрилтэ, «Коммунэнерго», «Ленагаз» тэрилтэлэр күүс-көмө буолбуттар. Онтон ыла күн бүгүн олох тэтимин кытта бииргэ сайдан таһаарыылаахтык үлэлии-хамсыы сылдьаллар.
Быыстапка аһыллыытын үөрүүлээх тэрээһинигэр улуус дьаһалтатыттан «Нам улууһа» МТ баһылыгын бастакы солбуйааччы Инна Сивцева, олохтоох бэйэни салайыныы уонна тэрийэр отдел начальнига Сергей Сергучев, студия директордарынан үлэлээбит Иннокентий Кривошапкин, Гаврил Шишкин, студияҕа үлэлээбит Андрей Зымятин, Марина Кокорева, Александр Кириллин, Майя Софронова уо.д.а. ыалдьыттаатылар. Бу күн студия сайдыытыгар сыраларын уурбут, кыһамньылаахтык үлэлээбит дьон урукку кэмнэрин истиҥ-иһирэх тылынан ахтан-санаан аастылар.
Музей сотруднига, норуот маастара Рустам Федоров быыстапка саалатын олус үчүгэйдик кичэйэн, ис хоһоонун саас-сааһынан кэпсиир курдук оҥорбутун кэлбит дьон сөҕө-махтайа көрдө. Манна студия 25 сылы быһа туттан кэлбит тэриллэрэ, техникалара уонна уруккуну-билиҥҥини көрдөрөр, быһаарар хаартыска стендэтэ дьон көрүүтүгэр турда.
Билигин «Саха» НКИХ Намнааҕы филиалыгар алта киһи үлэлиир. 2015 сылтан филиалы Иннокентий Кривошапкин салайар.