Պատ, թե՞ լիճ. տեսողական պատրանքը համացանցի քննարկման առարկա է դարձել (լուսանկար)
Daily Mail-ը ներկայացրել է Imgur կայքում տեղադրված լուսանկարներից մեկը, որում լեռ է պատկերված: Առաջին հայացքից պարզ թվացող լուսանկարը համացանցում բուռն քննարկումների առիթ է դարձել և գրավել է մամուլի ուշադրությունը:
Խնդիրն այն է, որ համացանցի օգտատերերը սկսել են քննարկել` լուսանկարում լեռան ստորոտի հատվածում պատ է երևում, թե լիճ: Լուսանկարը բավականին վաղուց տեղադրել է Bruuntilde կեղծանունով գրանցված օգտատերը, սակայն միայն հիմա է հայտնվել ուշադրության կենտրոնում:
Լուսանկարին կից գրված է. «Տեսնում եք արդյո՞ք լիճը»: Մինչդեռ օգտատերերից շատերը պնդում են որ միայն բետոնե պատ են տեսնում:
Զարմանալի է, սակայն Daily Mail-ի լրագրողները ևս պնդում են, որ լուսանկարում իսկապես պատ է պատկերված:
Պատի և լճի հետ կապված հանելուկը օգտատերերին հիշեցրել է անցյալ տարվա համացանցում բանավեճի առիթ դարձած կապույտ-սև զգեստի մասին, որը լուսանկարում շատերը տեսնում էին սպիտակ-ոսկեգույն երանգների մեջ: