Йеменде хусит козголоңчулары маанилүү порттордон кете баштады
Портторду Бириккен Улуттар Уюмунун (БУУ) көзөмөлүнө өткөрүү - тынчтык планынын пункттарынын бири. Мындай келишимге былтыр жаатташкан тараптар Стокгольмдо кол коюшкан. Бирок аны ишке ашыруу көпкө созулуп, келишимдин аткарылбай жатышына тараптар бири бирин күнөөлөп келишкен. Стокгольм макулдашуусуна ылайык, эки тарап тең күчтөрүн тыйышы зарыл.
Хусит козголоңчуларынын порттордон кетип жатканын «Reuters» агенттигинин булактары жана БУУнун өкүлдөрү тастыкташты. Йемен өкмөтүнүн өкүлдөрү болсо жагдайды өз көзү менен көрмөйүнчө, пикир айтууга эрте экенин билдирип жатышат.
2018-жылы Ходейда портунда катуу салгылашуулар болгон. 2015-жылдан берки Йемендеги кагылыштарда 10 миң адам кырылып, 14 миллион киши ачарчылыкта жашап жатат.
Иран колдогон хуситтердин «Ансар Аллах» тобу Йемендин батышынын бир бөлүгүн, баш калаа Сана шаарын да көзөмөлдөйт. Аларга каршы өкмөттүк күчтөрдү Сауд Арабиясы башында турган араб коалициясы кубаттайт.