Табиблар ике тапкыр дөрес диагноз куймау аркасында 9 яшьлек бала үлгән
Красноярск краенда тугыз яшьлек бала үлүе сәбәпле, җинаять эше кузгатылган.
Тикшерү комитеты хәбәр итүенчә, Минусинск шәһәрендә яшәүче тугыз яшьлек малай 30 мартта авырый башлый. Әнисе ашыгыч ярдәм чакырта. Фельдшер ангина диагнозы куеп, баланы госпитализацияләүдән баш тарта, дарулар билгеләү белән чикләнә.
1 апрельдә баланың хәле авырая. Тагын ашыгыч ярдәм чакыралар, баланы Минусинск хастаханәсенә салалар, тонзиллит диагнозы куялар һәм шул авырудан дәвалыйлар.
2 апрельдә баланың хәле тагын да авырая, аны реанимациягә салалар, әмма гомерен саклап кала алмыйлар. Экспертиза анда менингит булуын, үлем сәбәбенең шул булганлыгын ачыклый.
Җинаять эше «профессиональ вазифаларны тиешенчә үтәмәү аркасында саксызлык нәтиҗәсендә кеше үтерү» маддәсе буенча кузгатылган. Бу маддә буенча өч елга кадәр иректән мәхрүм итү каралган.