Ҳўрмуз бўғози қайта ёпилди: минтақада кескинлик кучайди
Эрон томони Ҳўрмуз бўғозининг янада қайта ёпилганини расман эълон қилди. Бу ҳақда IRNA ахборот агентлиги хабар тарқатди.
“Ҳотам ал-Анбиё” марказий қўмондонлиги вакили маълум қилишича, АҚШ томонидан денгиз йўлларидаги босим ва қамал ҳаракатлари давом этаётгани сабабли Ҳўрмуз бўғози қайтадан ёпиш режимига ўтказилган.
Расмий баёнотда қайд этилишича, Эрон Ислом Республикаси аввалроқ эришилган келишувларга мувофиқ равишда, чекланган ҳажмдаги нефть ва савдо кемаларининг ўтишига рухсат берган эди.
Бироқ, қўмондонлик вакили таъкидлашича, АҚШ ўз ваъдаларини бузиб, денгиз йўлларида босим ва назоратни кучайтиришда давом этмоқда. Шу сабабли Эрон томони Ҳўрмуз бўғози устидан аввалги қатъий режимни қайта тиклашга мажбур бўлган.
“Эндиликда ушбу стратегик сув йўли Эрон қуролли кучларининг тўлиқ назорати остида бўлади”, — дейилади баёнотда.
Шу билан бирга, вакилнинг қўшимча қилишича, АҚШ Эрондан чиқувчи ва кирувчи барча кемалар учун тўлиқ эркин ҳаракатни таъминламас экан, бўғоздаги вазият қаттиқ назоратда қолаверади.
17 апрель куни Эрон ташқи ишлар вазири Аббос Арақчи Ҳўрмуз бўғози маълум муддатга тижорат кемалари учун очилганини билдирган эди. Бу қарор Исроил ва “Ҳизбуллоҳ” ўртасидаги ўт очишни тўхтатиш келишуви доирасида қабул қилингани айтилган.
Бироқ АҚШ президенти Доналд Трамп Теҳроннинг бу баёнотига қарамай, Эроннинг ҳарбий-денгиз блокадаси ўз кучида қолишини таъкидлаган.