Шавкат Мирзиёев 9 майга тайёргарлик ва ҳарбий тизимни кучайтирмоқда
Шавкат Мирзиёевга Ўзбекистон Қуролли кучлари олий бош қўмондони сифатида ҳарбий хизматчиларни ижтимоий қўллаб-қувватлаш, резерв ва захира офицерлар тайёрлаш тизимини такомиллаштириш ҳамда 9 май – Хотира ва қадрлаш кунига тайёргарлик ишлари юзасидан ахборот тақдим этилди.
Режага кўра, жорий йилда Иккинчи жаҳон уруши қатнашчилари ва ногиронларига 30 миллион сўм миқдорида бир марталик пул мукофоти тўланиши таклиф қилинмоқда. Бу қарор уруш фахрийларига бўлган эътиборни янада кучайтиришга қаратилган.
Шу билан бирга, байрам кунлари уруш қатнашчилари, фронт орти меҳнат фахрийлари, кексалар ҳамда устозларга алоҳида ҳурмат кўрсатиш, ёлғиз ва кам таъминланган фахрийларнинг уй-жойларини ободонлаштириш, хотира тадбирларини кенг миқёсда ташкил этиш режалаштирилган.
Мустақиллик йилларида хизмат бурчини адо этиш чоғида ҳалок бўлган Ватан ҳимоячилари хотираси ҳам улуғланади. Уларнинг оила аъзоларига моддий ва маънавий ёрдам кўрсатиш чоралари ҳам тизимли равишда давом эттирилади.
Мудофаа тизимидаги ижтимоий қўллаб-қувватлаш доирасида офицерларга хизмат йиллари учун бериладиган ойлик устамалар икки баробарга оширилади. Контракт асосида хизмат қилаётган аскар ва сержантларнинг ойлик маоши эса 10 фоизга кўпайтирилади.
Ҳозирги кунда 4 та олий таълим ва 2 та олий ҳарбий таълим муассасаларида 42 та йўналиш бўйича резерв офицерлар тайёрланмоқда. Шунингдек, Урганч, Термиз, Андижон давлат университетлари, Самарқанд иқтисодиёт ва сервис институти ҳамда Андижон давлат тиббиёт институти базасида яна 5 та ҳарбий тайёргарлик маркази ташкил этилиши режалаштирилган.
Бундан ташқари, давлат олий таълим муассасаларида «чақириққача ҳарбий таълим» йўналиши асосида 3 йиллик бакалавриат тизими жорий этилиб, резерв ва захира офицерлар тайёрлаш кенгайтирилади. Ҳарбий тиббиёт институтида эса клиник ординатура ва магистратура босқичларига қабул қилинган талабалар учун махсус ҳарбий тайёргарлик имконияти яратилади, бу тизим нодавлат олий таълим муассасаларига ҳам татбиқ этилади.
Янгиланган ёндашув мамлакат мудофаа салоҳиятини мустаҳкамлаш ва ҳарбий хизматчиларни қўллаб-қувватлаш тизимини янги босқичга олиб чиқишга қаратилган.