Арбелоа "Бавария"дан учралган мағлубиятга қандай изоҳ берди?
“Реал Мадрид” бош мураббийи Альваро Арбелоа “Бавария”га қарши Чемпионлар лигаси жавоб учрашувидан (3:4, биринчи ўйин 1:2) кейин матбуотга фикр билдирди.
Унинг сўзларига кўра, жамоа майдонда жуда кучли ва мазмунли ўйин кўрсатган. Арбелоа футболчиларнинг меҳнатидан мамнун эканини, аммо натижа барибир оғриқли бўлганини яширмади. Шу билан бирга, у мухлислар — стадионда ва экран ортида жамоани қўллаб турган ишқибозлар учун ҳам афсус билдирди:
“Бу менинг футболчиларим ижросида ажойиб ўйин бўлди. Улар кўрсатган меҳнат учун жуда ачиняпман. Шунингдек, стадионга келган ва уйда кузатган мухлисларимиз учун ҳам ачиняпман”, — деди Арбелоа.
Мураббийнинг таъкидлашича, “Реал” бу мавсумда орзу қилган 16-Европа титулига эриша олмади. Бу эса клуб учун жиддий зарба бўлди. Бироқ у жамоа барибир ўз қадриятлари ва клуб герби учун охиригача курашганини алоҳида қайд этди:
"Бу йил Чемпионлар лигасида 16-чи титулни қўлга кирита олмаслигимиз оғриқли. Лекин жамоа барча кучини берди ва биз ўз гербимиз билан қайтамиз”, — деди Арбелоа.
Арбелоа ўйин давомида бир нечта гол уриш имкониятлари бўлганини ҳам эслатди. Унинг айтишича, баъзи футболчилар чарчоқ ҳис қилгани сабабли алмаштириш режалаштирилган эди, лекин ўйиндаги бурилиш барча режаларни ўзгартириб юборган:
"Бизда гол уриш учун имкониятлар бўлди. Айрим футболчилар чарчаган эди ва алмаштиришга тайёрланаётгандик, аммо голдан кейин барчаси ҳал бўлди”, — деди Арбелоа.
Шу билан бирга, у Ла Лигадаги кураш ҳам осон бўлмаслигини таъкидлади. Жамоа учун энди ҳар бир учрашув ҳал қилувчи аҳамиятга эга бўлиб, мавсум охиригача максимал куч билан ҳаракат қилиш шарт:
"Чемпионатда ҳам осон бўлмайди, аммо сўнгги тургача курашишимиз керак”, — деди Арбелоа.
Қисқаси, “Реал” Европа аренасини тарк этди, аммо Арбелоа сўзига кўра, жамоа руҳан синган эмас — кураш давом этади.