"Bizni kechir, Ukraina!" Rossiyada urushga qarshilarning umidsiz kayfiyati
Moskva, Sankt-Peterburg va boshqa yirik shaharlari ko‘chalariga chiqqan rossiyaliklar "Yo‘qolsin urush!" deya hayqirganlar. Rossiyaning Ukrainaga urushi boshlangan 24 - fevraldan buyon qo‘lga olinganlar soni 4 500 kishidan oshib ketgan.
27 yoshli Aleksandra va Anna Ukrainaning Moskvadagi elchixonasida Rossiya bosqinidan keyin sharmandalik, iztirobni ifoda etgan holda va umidsizlik ohangida, ukrainaliklardan chin dildan kechirim so‘rashgan.
Ular o‘z familiyalarini aytishdan bosh tortgan va ukalari Qrimdagi mashg‘ulotlardan so‘ng Rossiya Milliy gvardiyasi tarkibiga yuborilganini ma’lum qildi.
"Men bu urushga qat’iyan qarshiman va zudlik bilan tugatilishini istayman. Ich-ichimdan Ukraina xalqi, halok bo‘lganlar, jabrlanganlar va mojaro zonasidagilarga achinyapman", - deya Aleksandraning so‘zlaridan iqtibos keltiradi Reuters agentligi.
U elchixona ro‘parasida gul qoldirdi. chunki elchixona yaqini barrikadalar bilan to‘silgan va atrofpolitsiyachilar bilan o‘ralgan. Boshqalar Ukraina bayrog‘i chizilgan qog‘ozlarda “Bizni kechiring” yozuvli posterlar qoldirdi.
Ko‘p o‘tmay, bu narsalarning bari olib tashlangan. Politsiya xodimining Reuters agentligiga aytishicha, yo‘ldan o‘tayotganlarga xalal bermasligi uchun gullar har ikki soatda olib ketilyapti.
OVD-Info nashriga ko‘ra, payshanba kunidan buyon urushga qarshi namoyishlarga chiqqan qariyb 6000 kishi hibsga olingan. Moskvadagi maydonlarda politsiya nazorati kuchaytirilmoqda. Yakshanba kuni Pushkin maydoni yopib qo‘yilgan.
Jamoatchilikning bosqinchilikka munosabati haqida hozircha so‘rov natijalari yo‘q, biroq prezident Vladimir Putinning reytingi yuqori va ko‘pchilik uni qo‘llab-quvvatlaydi, deb ko‘rilmoqda.
Putinning yadroviy kuchlarni shay holatga keltirish haqidagi buyrug‘idan so‘ng yakshanba kuni Rossiyadagi xorijliklar mamlakatni tark etish haqida o‘ylay boshladi.
Moskvadagi ba’zi bankomatlarda naqd pul qolmagan. Sankt-Peterburgda naqd pul yechib olish uchun uzun navbatlar paydo bo‘ldi.
AQSh elchixonasi o‘z fuqarolarini ko‘plab davlatlar havo hududini Rossiya aviakompaniyalari uchun yopayotgani sababli mamlakatni "darhol" tark etishga chaqirgan. Fransiya hukumati ham yakshanba kuni Rossiyaga qisqa muddatga tashrif buyurgan barcha fuqarolaridan zudlik bilan ortga qaytishni so‘radi.
Ukraina elchixonasida Aleksandra uning barcha do‘stlari urushga qarshi ekanligini biroq, ko‘pchilik ruslar, shu jumladan uning ota-onasi ham urushni qo‘llab-quvvatlashini ta’kidladi.
"Ota-onam shaharda yashamaydi. Ular televizordagi targ‘ibotga ishonadi. Biz har kuni bahslashamiz.
Anna hibsga olinish xavfiga qaramay har kuni norozilik bildirmoqda. U o‘tmishda muxolif siyosatchilarni ko‘proq qo‘llab-quvvatlamaganidan afsusda va u bosqin uchun o‘zini ham aybdor his qilmoqda.
"Hozir bizni jipslashtiradigan hech kim yo‘q. Ular yo qamoqda yoki ularga ekstremist degan tamg‘a bosilgan. Bo‘layotgan voqealarda aybdormiz, shaxsan o‘zim ham".
Annaning aytishicha, uning ukasi, 18 yoshli harbiy xizmatchi, u na vaziyatni tanqidiy baholay oladi, na qonuniy ravishda xizmatdan ketoladi.
"U qishloqda o‘sgan. Mustaqil OAV dasturlarini ko‘rmagan faqat davlat televideniyesini ko‘rib ulg‘aygan. Boshlig‘i unga buyruq bersa, rad eta olmaydi. U harbiy xizmatchi".