Британия кейинги ҳафтадан Ўзбекистонда берилган ковид-сертификатлардан айримларини тан ола бошлайди
Жорий йилнинг 10 январидан эътиборан Буюк Британия Ўзбекистонда берилган коронавирусга қарши эмланганлик тўғрисидаги сертификатларини расман тан олади. Бу ҳақда ТИВ матбуот хизмати Ўзбекистоннинг Лондондаги элчихонасидан олинган маълумотларга таянган ҳолда маълум қилди.
Қайд этилишича, ковид-сертификат Британияга келишидан камида 14 кун олдин Covaxin, Moderna, Janssen (битта доза), Novavax (Nuvaxovid и Covovax), Oxford/AstraZeneca, Pfizer/BioNTech, Sinopharm Beijing, Sinovac-CoronaVac каби вакциналардан бири билан эмланишнинг тўлиқ курсини тугатган бўлса, эмланганлик сертификати ҳақиқий деб тан олинади.
Лондон томонидан тан олинажак вакциналар ичида Ўзбекистонда Moderna, AstraZeneca, Pfizer/BioNTech ҳамда Хитойнинг Sinovac вакциналари мавжуд, бироқ ўзбекистонликлар энг кўп эмланаётган ZF-UZ-VAC 2001 (Ўзбекистон-Хитой) ҳамда Спутник (Россия) вакциналари британияликлар рўйхатига киритилган эмас.
Ўзбекистон сертификатининг тан олиниши эмланган фуқароларга ПЗР тести натижасини тақдим этмай: Британияга кириш имконини бериши ва уларни 10 кунлик карантиндан ўтиш мажбуриятидан озод қилиши айтилган.