Қирғизистон парламенти Қозоғистонга 150 нафар ҳарбий юборишни маъқуллади
![Қирғизистон парламенти Қозоғистонга 150 нафар ҳарбий юборишни маъқуллади](https://gdb.rferl.org/08810000-0a00-0242-4ebf-08d9d0f76de8_cx1_cy1_cw98_w800_h450.jpg)
Қирғизистон Жогорку Кенеши Қозоғистонга тинчликпарвар кучларни йўллаш ҳақида қарор қабул қилди. Бу ҳақда ижтимоий тармоқларда депутат Достон Бекешов маълум қилган.
Бекешовга кўра, депутатлар икки марта овоз беришган. Биринчи мартасида қарор “ўтмагач”, айрим депутатлар иккинчи марта овозга қўйишни илтимос қилганлар. Бу сафар 69 депутат қарорни ёқлаб, 7 нафари унга қарши овоз берган.
“Қарорга мувофиқ, биз 150 аскарни чекланган муддатга юборяпмиз. Аниқ муддатни Қозоғистондаги қўмондонлик белгилайди”, дейди Бекешов.
Бу маълумотни парламент йиғилишидан сўнг МХДҚ раиси Қамчибек Ташиев ҳам тасдиқлаган. Унинг аниқлик киритишича, 150 ҳарбий хизматчи билан бирга 8 та зирҳли техника ва 11 та ҳарбий автомобиль юбориш кўзда тутилган. Шунингдек, Ташиев қирғиз аскарлари митингларни тарқатиш ёки тартиб ўрнатишда иштирок этмаслигини, балки муҳим давлат объектларини қўриқлашини урғулаган.
Қарор муҳокама қилинаётган пайтда парламент биноси қаршисида Қозоғистонга ҳарбийларни жўнатмаслик талаби билан пикет ўтказилди.
Аввалроқ МХДҚ раиси Ташиев Қозоғистонга 150 нафар ҳарбий, 8 та зирҳли техника ва 11 та автомобиль юбориш таклиф қилинаётгани ҳақида маълум қилган эди. У қўшинлар аҳамиятга молик давлат объектларини қўриқлашлари, бироқ митингларни тарқатиш ёки интизомни тиклаш ишларида иштирок этмасликларини урғулаган.
Янги йил бошидан суюлтирилган газ нархи оширилишига қарши 2 январь куни Қозоғистон ғарбида бошланган норозилик тўлқини ўтган бир неча кун ичида бутун мамлакат бўйлаб ёйилган.
Ҳукумат газ нархи туширилишини эълон қилганига қарамай, норозиликлар тўхтагани йўқ - намойишчилар сиёсий талабларни илгари сура бошлашган, пировардида ҳукумат истеъфога кетган. 5 январь куни бутун мамлакат бўйлаб фавқулодда ҳолат тартиби жорий қилинган.
Норозилик чиқишлари ортидан намойишчилар ва хавфсизлик кучлари ўртасида юзага келган тўқнашувларда бир неча киши ҳалок бўлган.
Қозоғистон президенти сўрови билан 6 январь куни мамлакатга КХШТ (мазкур ташкилотга Қирғизистон ҳам аъзо) кучлари киритилган. Аввалроқ КХШТ бош котиби Станислав Зась Қозоғистонга ташкилотга аъзо давлатлардан 2,5 минг нафар ҳарбий йўлланишини билдирган.