Байден Россиянинг киберҳужумларига жавоб қайтариш масаласида йиғилиш ўтказади
Қўшма Штатларга нисбатан “ўғри” компьютер дастурларини қўллаган ҳолда уюштирилаётган ҳакерлик ҳужумлари ҳозирча унчалик кучли эмас. Бу фикрни АҚШ президенти Жо Байден 6 июль кунги чиқишида билдирди.
Президент Американинг Kaseya фирмаси компьютер дастурларидан фойдаланувчи дунёдаги камида бир ярим минг ширкатнинг компьютер тармоқларига бўлаётган ҳужумлар ҳақидаги саволга жавоб берган.
Дастлабки маълумотларга кўра, REvil номи билан машҳур россиялик ҳакерлар гуруҳи Kaseya фирмасининг дастурий таъминотидан унинг мижозлари компьютерларини блоклашда фойдаланган ва компьютерларни қайтадан очиб бериш учун улардан товон талаб қилган.
Бу ҳужум ҳақида жамоатчилик 2 июль куни хабар топган. Мутахассислар уни шу пайтгача маълум ҳакерлик ҳамлалари орасида энг каттаси, дея баҳолашмоқда. Kaseya фирмаси хизматларидан дунё бўйича юз минглаб, асосан майда ширкатлар фойдаланади, шу боис мутахассислар мазкур ҳужум кўламини аниқ баҳолаш ҳозирча имконсизлигини айтишмоқда.
Швециянинг Coop Sweden савдо тармоғи жума куни ўз дўконларида ишни бир неча соатга тўхтатиб туришга мажбур бўлган.
2 июль куни Американинг Synnex ширкати Россиянинг CozyBear ҳакерлик гуруҳи ҳужумига йўлиққани тўғрисида маълумот пайдо бўлган. Synnex’нинг компьютер дастурларидан АҚШ Республикачилар партияси Миллий қўмитаси (RNC) фойдаланади. RNC вакиллари текширув ўтказишганини, аммо компьютерларига бегоналар кирганлигига оид белгиларни топишмаганини маълум қилишган. 2016 йилда CozyBear Демократик партия Миллий қўмитаси компьютерларига киришга муваффақ бўлганди.
Америкалик экспертлар CozyBear ва REvil Россия разведка хизматларига алоқадорлигини айтишади.
Ушбу ҳакерлик ҳужумлари алоҳида эътибор қаратилаётгани сабабларидан бири шуки, улар Жо Байден ва Владимир Путин Женевада учрашганидан сўнг бир оз вақт ўтиб юз бермоқда. Ўша учрашувда АҚШ президенти Россия ҳудудидан уюштирилаётган ҳакерлик ҳамлалари учун жавобгарлик Кремль зиммасида эканини ва уларга қарши муносиб жавоб қайтарилишини айтиб, Россия президентини огоҳлантирган эди.
Оқ уй матбуот котибининг маълум қилишича, 7 июль куни президент Байден ва вице-президент Ҳаррис Америка хавфсизлик хизматлари раҳбарлари билан йиғилиш ўтказади, йиғилишда ҳужумларга қарши жавоб чоралари муҳокама қилинади.