Европа Иттифоқи Минскдан Виктор Бабарикони дарҳол озод этишни талаб қилди
Европа Иттифоқи 6 июль куни Беларусь ҳукуматидан Виктор Бабарикони, шунингдек журналистлар ва ўзларининг тамал ҳуқуқларини ҳимоя қилгани учун қамоққа тушган барча тутқунларни “дарҳол ва шарт қўймасдан озод этиш”ни талаб қилди.
Европа ташқи сиёсий фаолият хизмати (ЕТСФХ) матбуот котиби Петер Стано баёнотида 14 йилга озодликдан маҳрум этилган Виктор Бабариконинг “2020 йил август ойидаги президент сайловида номзод сифатида иштирок этиш билан ўз сиёсий ҳуқуқинини амалга оширишга урингани учунгина” 2020 йил июндан бери қамоқда сақланаётгани урғуланган. Бу ҳақда “Немис тўлқини” хабар қилган.
Беларусь Олий суди 6 июль куни “Белгазпромбанк”нинг собиқ раҳбари, президентликка собиқ номзод Виктор Бабарико 14 йиллик қамоқ жазосига ҳукм қилганди.
Европа Иттифоқи фикрича, мазкур ҳукм — яқинда сиёсийлаштирилган суд жараёнларида ўзбошимчалик билан қабул қилинган камида 125 та адолатсиз ҳукмдан биттаси, холос. “Ушбу суд жараёнлари кўп ҳолларда ёпиқ тарзда ва зарур тартиб-таомилларга риоя қилмаган ҳолда ўтказилган”, дейилган Петер Стано баёнотида.
Европа Иттифоқи Минскдаги режим “қатағонлар ва адолатсизликни тўхтатиши ва айбдорларни жазога тортиши лозим”, деб билади. Шу билан бирга, Брюссель ҳукуматни демократик мухолифат ва фуқаролик жамияти вакиллари билан кенг қамровли сиёсий мулоқотга чақиришда давом этади. Бундай мулоқот мамлакатни, ЕХҲТ кўмагида янги, эркин ва адолатли сайловларга элтган бўлур эди, деб ҳисоблайди Европа Иттифоқи раҳбарияти.