Путин Россияси ҳам албатта қулайди…
Россия албатта озод бўлади!
Бугун Россиянинг йирик шаҳарлари яна ҳақ ва эркинлик талабида кўчаларга, майдонларга чиқади.
Эътиборлиси, ўғри Путин томонидан бир парча қоғозга айлантирилган Россия Конституциясининг 31-моддаси митинг ва намойишлар ҳуқуқини тўлиқ кафолатлаган. Йиллар давомида рус зиёлилари, талабалари, Путиннинг охуридан емак ейишга ўтмаган сиёсатчи борки, «Стратегия 31» қадриятларини илгари суриб келишган, 31- сана билан тугайдиган ойларда ўзи истакларига кўра, намойиш ва митингларга чиқишган. Шу маънода бугун эски ва янги талаблар уйғунлашадиган ҳам кун.
Бункерида яшириниб етган Путин шунчалар талвасадаки, Москва маркази транспорт ҳаракатидан буткул тўхтатилган. Метро станциялари ёпилган. Кеча тундан бошлаб полицияга қўшимча Нацгвардия ва ҳатто армия қисмлари ҳам сафарбар этилган. Журналистлар ёппасига ҳибсга олинмоқда. Талабалар университетлардан ҳайдалмоқда. Путин том маънода Россия халқига қарши урушга тайёргарлик кўрмоқда.
Раҳматли Рауф Парфи ўтган асрнинг 70- йилларда яқинда Совет иттифоқи қулайди, деб айтишни канда қилмаган. Қачон деб сўрашса, билмайман, лекин албатта қулайди, деб жавоб бераркан. Чунки буюк Рауф Парфи тарихий жараён силсилаларини ҳис қила олган, макон ва замон ўзгаришлари қаён элтишини тушунган.
Зулм, зўравонлик, ҳақсизлик, қотиллик, ёлғон ва иккиюзламачиликни қоидага айлантирган Путин Россияси ҳам албатта қулайди. Қачонлиги номаълум, лекин албатта қулайди.
Ва Россия албатта озод бўлади!