Шота Арвеладзе: "Пахтакор"да ҳам ўйин тақдирини ҳал этадиган футболчилар бор

ОЧЛ 4-тур доирасидаги "Ал Садд" - "Пахтакор" учрашуви олдидан ташкил этилган матбуот анжуманининг иккинчи қисмида "шерлар" бош мураббийи Шота Арвеладзе ва жамоа сардори Егор Кримец қатнашишди. Шота Арвеладзе: - "Очколар эътибори билан жуда қийин ва аҳамиятли ўйин бўлади. Футбол ўйнашни хуш кўрувчи жамоалар иштирокидаги қизиқарли учрашув бўлиши шубҳасиз. Рақиб ҳам, биз ҳам ўйинни назорат қилишни ёқтирамиз. Ўйлайманки, мухлислар эртага жозибадор футбол гувоҳига айланишади. Йўқотишлар йўқ. Сафдаги барча ўйинга шай ҳолатда. Ўзгаришлар? Буни олдиндан айтиб бермоқчи эмасман. Ҳаммасини эртага кўрасиз. Гуруҳимизда кучли жамоалар жамланган. Масалан ҳеч бир турда қайсидир жамоанинг ғалабаси мен учун сюрприз бўлмайди. Ҳозирги ҳолатда гуруҳдаги барча жамоаларда плей-офф босқичига чиқиш имконияти мавжуд. Ҳар бир ўйин бир-биридан фарқ қилади. Лекин ўйлашимча, бўлажак баҳс ҳам Тошкентдагидек томошабоп ва қизиқарли ўтади. Нафақат "Ал Садд" таркибида, балки бизда ҳам ўйин тақдирини ҳал этиб қўя оладиган футболчилар бор. "Пахтакор" сафида юқори сифатли ўйин кўрсатадиган ижрочилар етарли. Эртага ўйинда бунга ўзингиз гувоҳ бўлишингиз мумкин. Албатта, ҳар бир ўйиндан кейин рақиб ҳақида янада янги ва керакли маълумотлар оласиз. Тошкентдаги баҳсдан кейин ҳам одатдагидек ўйинни қайта кўриб, рақибни янада чуқур ўрганиб чиқдим. Ўзим учун баъзи жиҳатларни белгилаб қўйдим. Умид қиламанки, эртага айнан шу тарафлардан фойда чиқарамиз". Егор Кримец: - Эртага жуда мураккаб баҳс бўлади. Ҳар иккала жамоа учун бўлажак ўйин кўп нарсани ҳал қилиб бериши мумкин. Ўйлашимча, жамоалар жисмонан ва тактик томондан ўйинга тайёр. Умид қиламанки, эртага ғалаба ва омад биз томонда бўлади. Қатардан имкон қадар максимум очко билан Тошкентга қайтишга интиламиз. Биз эртага дуранг учун эмас, балки максимум натижа, яъни ғалаба қозониш илинжида майдонга тушамиз. Манба: championat.asia