АҚШ ва Европа давлатлари Саудиянинг Хашогги ўлимига берган изоҳидан қониқмади
АҚШ, Канада ва Европа давлатлари Саудия Арабистонининг "Вашингтон пост" мухбири Жамол Хашогги ўлими бўйича берган расмий баёнотидан қониқиш ҳис қилмаганини билдирмоқда.
АҚШ президенти Трамп 20 октябрь куни журналистлар билан мулоқотда қотилликка оид саволларга "жавоб топмагунча, қониқиш ҳис қилмаймиз", деб баёнот берди. Шунингдек, президент Риёдга қарши санкциялар қўллаш масаласини ўйлаётгани, қироллик шаҳзодаси Муҳаммад бин Салмон билан сўзлашишни режалаётганини айтди.
Саудия Арабистони Трамп бошчилигидаги АҚШнинг яқин иттифоқчиларидан бири бўлиб қолаётир.
Европа Иттифоқи бош дипломати Федерика Могерини ҳаммани "чуқур ташвиш"га солиб турган қотиллик бўйича ҳақиқий суриштирув ўтказиш ва жиноятга масъулларни жавобгарликка тортишга эришишга чақирди.
Давлатга қарашли ахборот агентлиги бўлган Saudi Press Agency 20 октябрь куни қироллик мулозимларидан биридан "Вашингтон пост" мухбирининг ўлдирилишидан "Қироллик чуқур афсусда эканини билдиради", дея иқтибос келтирди.
Расмий баёнотда журналистнинг 2 октябрь куни Истанбулдаги консуллик биносига кириб кетганидан сўнг ўлдирилгани илк бор тилга олинди.
Айтилишича, Саудия прокурорлари ўз суриштирувини ўтказган ва унинг натижасида "журналист билан консулликда бўлган бошқа шахслар орасида муштлашув чиққани, бунинг натижасида Хашоггининг ўлгани аниқланган".