Татарстанлыларга пилотсыз очкыч һөҗүме вакытында үз-үзеңне тоту кагыйдәләрен искәрттеләр

Пилотсыз очкыч һөҗүм итү куркынычы игълан ителгән икән, үз гомереңне саклау һәм якыннарыңны коткарып калу өчен мөһим адымнар ясарга кирәк. Әгәр һөҗүм вакытында бинада булсагыз, аскы катларга – подвалга яки паркингка төшәргә кирәк, лифт кулланырга ярамый. Шулай ук якындагы бинада яки җир асты кичүендә яшеренү урыны эзләргә була. Бу хакта Россия Гадәттән тыш хәлләр министрлыгының Татарстан буенча Баш идарәсендә хәбәр иттеләр.

Әгәр фатирда икәнсез, тәрәзәләр булмаган урынга барыгыз, терәк стеналар арасында урнашыгыз. Кагыйдә буларак, бу – ванна бүлмәсе. Идәнгә утырырга һәм тәрәзә яныннан ераккарак китәргә кирәк.

Әгәр җимерелгән пилотсыз очкыч калдыклары күрсәгез, аларга һич кенә дә кагылырга ярамый.

«Әгәр пилотсыз очкычны фотога яки видеога төшерә алсагыз, аны полиция хезмәткәрләренә тапшырыгыз. Бу хакта «112» номерына шалтыратып хәбәр итегез. Фото һәм видеоларны социаль челтәрләрдә таратырга ярамый – бу дошманга һөҗүмне кабатларга ярдәм итәргә мөмкин. Шулай ук пилотсыз очкыч турында тикшерелмәгән мәгълүматны интернетта таратырга ярамый», – дип хәбәр иттеләр Гадәттән тыш хәлләр министрлыгында.

Әгәр һавада пилотсыз очкыч күрсәгез, турыдан-туры аның күз уңына эләкмәскә тырышыгыз – яшеренү урыны табыгыз яки читкәрәк китегез.

Пилотсыз очкыч янәшәсендә рация, мобиль телефоннар, GPS җайланмалары һәм башка электрон җиһазлар куллану тыела. Бу дрон эшенә йогынты ясарга һәм көтелмәгән нәтиҗәләр, шул исәптән детонация китереп чыгарырга мөмкин. Пилотсыз очкычның кыйпылчыклары да куркыныч тудыра ала.

Россия Гадәттән тыш хәлләр министрлыгы кушымтасын йөкләгез, бу пилотсыз очкыч һөҗүме куркынычы якынлашу һәм башка гадәттән тыш хәлләр турында хәбәрләрне шунда ук алырга булыша.