Идарәче компанияләр эшенә һәм коммуналь хезмәтләр өчен түләү исәпләүгә зарланучылар артты
2023 елның сентябреннән 2024 елның маена кадәр Татарстан Дәүләт торак инспекциясе сыйфатсыз хезмәт күрсәтү турында 14 748 шикаять кабул иткән. Мөрәҗәгатьләрнең яртысыннан артыгы күп фатирлы йортларда гомумйорт мөлкәтен карауга кагылган. Идарәче компанияләрнең эше һәм торак коммуналь хезмәтләр өчен түләү бәясен исәпләүгә карата шикаятьләр саны арткан. Бу хакта Татарстан Республикасы Министрлар Кабинетының 2023/2024 елгы җылыту чоры йомгакларына багышланган утырышында Премьер-министр Алексей Песошин әйтте.
«Идарәче оешмаларның эшчәнлеге, коммуналь хезмәтләр өчен түләүләрне исәпләү буенча мөрәҗәгатьләр саны артты. «Халык контроле» ТР Дәүләт мәгълүмат системасында җылыту сезоны дәвамында торак коммуналь хуҗалык юнәлеше буенча 6 627 хәбәр теркәлгән. Шуларның 5 635 буенча чаралар күрелгән. Җылылык белән тәэмин итү хезмәтен күрсәтү сыйфаты мәсьәләләре буенча 822 хәбәр теркәлгән, шулар арасыннан 779 мөрәҗәгать хәл ителгән», — дип хәбәр итә ТР Рәисенең матбугат хезмәте.
Утырышта ТР төзелеш, архитектура һәм торак-коммуналь хуҗалык министры Марат Айзатуллин хәбәр иткәнчә, Татарстанда узган җылыту чоры 253 көн дәвам иткән – бу елның 2/3 өлеше. Министр 2023/2024 елгы сезонга әзерлекне соңгы 10 елда иң уңышлысы дип атады.
Утырышта Татарстан Республикасы Рәисе Рөстәм Миңнеханов, ТР Дәүләт Советы Рәисе урынбасары Юрий Камалтынов катнашты.