Песошин җылыту сезонына әзерлек сыйфатын контрольдә тотуны көчәйтергә кушты
2023/2024 елгы җылыту сезоны дәвамында торак-коммуналь хуҗалык өлкәсендә 3 596 авария очрагы булган. Премьер-министр Алексей Песошин бу санның шактый зур булуын ассызыклады һәм объектларны әзерләү сыйфатын контрольдә тотуны көчәйтергә кушты.
«ТР Төзелеш министрлыгы, җылылык белән тәэмин итүче оешмалар җитәкчеләре, муниципаль районнар башлыкларыннан җылыту чорына әзерлек сыйфатын контрольдә тотуны көчәйтүне сорыйм. Челтәрле компанияләргә чираттагы җылыту чорына әзерлек вакытында ремонт эшләренең сыйфатын катырак контрольдә тотарга кирәк. Киләчәктә бу җылыту чорында Казан шәһәренең «XXI гасыр» торак микрорайонында булган авария кебек җитди аварияләрне булдырмас өчен, тузган җылылык һәм су белән тәэмин итү челтәрләрен вакытында ачыкларга һәм алыштырырга кирәк», - дип белдерде Премьер ТР Министрлар Кабинетының 2023/2024 елгы җылыту чоры нәтиҗәләренә багышланган утырышында.
Чарада Татарстан Республикасы Рәисе Рөстәм Миңнеханов, Дәүләт Советы Рәисе урынбасары Юрий Камалтынов катнашты, дип хәбәр итә республика җитәкчесенең матбугат хезмәте.