«Алга» батальоны хәрбиләре Әлмәт халкына ярдәм өчен рәхмәт белдерде

Әлмәт халкы махсус хәрби операция зонасына хәрби хезмәткәрләргә гуманитар йөк илтте. Бу юлы ярдәм «Алга» батальонына тапшырылды, аның авырлыгы 10 тоннадан артык тәшкил итте. Гуманитар конвой белән бергә шәһәр советы депутаты Вячеслав Колотовкин барды, дип сөйләделәр «Татар-информ»га муниципаль берәмлекнең матбугат хезмәтендә.

Гуманитар конвойга кирәкле техник чаралар, элемтә системалары, медикаментлар, азык-төлек, шулай ук окоп шәмнәре һәм волонтерлар ясаган маскировка челтәрләре кергән. Хәрбиләргә шулай ук мәктәп укучылары язган хатларны тапшырганнар.

Хәрби хезмәткәрләр битараф булмау һәм ярдәм өчен барысына да зур рәхмәт белдергән.

«Без, «Алга» батальоны хәрбиләре, Әлмәт районы башлыгына, «Үзебезнекеләрне ташламыйбыз» («СВОих не бросаем»), «Ассоль» һәм «Мегасети» штабларына, Кичүчат авылы, Әлмәт, Тихоново авылы халкына, 16 номерлы мәктәпкә безгә күрсәткән ярдәмнәре өчен зур рәхмәт белдерәбез. Бик зур рәхмәт сезгә! Җиңү безнеке булачак», - ди хәрбиләр видеода.

«Битараф булмаган халык һәм волонтерларга рәхмәт! Алар читтә калмыйча яклаучыларыбызга ярдәм итә. Бергә без һичшиксез җиңәчәкбез!» - дип билгеләп үтә район башлыгы Тимур Нәгуманов.

Махсус хәрби операция РФ Президенты Владимир Путин карары буенча 2022 елның 24 февраленнән үткәрелә. Хакимиятләр берничә тапкыр аның куелган максатларга ирешкәнче дәвам итәчәген белдерде. Максатлар арасында Россиянең иминлеген гарантияләүче шартлар булдыру да бар.

РФ Кораллы көчләре сафларында контракт буенча хезмәт итү, шулай ук премияләр, ташламалар һәм түләүләр турында heroes-tatarstan.ru сайтында яки 117 телефоны буенча белергә була.