Рөстәм Миңнеханов Сербия Республикасы Президенты белән очрашты
Татарстан Рәисе Рөстәм Миңнеханов Сербия Республикасы (Босния һәм Герцеговина) Президенты Милорад Додик белән очрашты. Ул республикага «Киләчәк уеннары» халыкара мультиспорт турниры чараларында катнашу һәм берничә фәнни һәм мәгариф учреждениеләрендә, тарихи һәм архитектура һәйкәлләрендә булу өчен килде. Бу хакта республика җитәкчесе матбугат хезмәте хәбәр итә.
Рөстәм Миңнеханов Милорад Додик белән элеккеге очрашуларның Босния һәм Герцеговинада (2021 ел) һәм Венгриядә (2023 ел) узганын искәртте.
«Безнең республикага сәфәрегез уңай тәэсир калдырыр дип өметләнәбез. Сезнең сәфәр вакытында бездә „Киләчәк уеннары» ярышлары узуы бик күңелле. Безнең республика ике атна дәвамында бөтен дөньядан спорт һәм компьютер уеннары яратучыларны җәлеп итү ноктасы булачак. Дөнья тарихында беренче тапкыр Казанда „Киләчәк уеннары» халыкара мультиспорт турниры — киберспорт ярышларын һәм классик спорт дисциплиналарын берләштерүче „фиджитал» инновацион форматтагы ярышлар уза», — диде Татарстан Рәисе.
Ул билгеләп үткәнчә, ярышларда Босния һәм Герцеговинадан ике спортчы катнаша. «Барысы да актив катнаша, бу форматны яхшы кабул иттеләр, — диде Рөстәм Миңнеханов. — Без спортчылар өчен барлык шартларны да тудырырга тиеш».
Татарстан Рәисе Россия белән хезмәттәшлек мәсьәләләре буенча Босния һәм Герцеговинаның эзлекле позициясе зур ышаныч тудыруына игътибар итте һәм кунакка мондый мөнәсәбәт өчен рәхмәт белдерде. «Бу хәзерге шартларда бик җиңел түгел», — дип билгеләп үтте республика җитәкчесе.
Аның сүзләренчә, Татарстан белән Босния һәм Герцеговина территория һәм халкы буенча охшаш. Ике республика да күп конфессияле. «Безнең уртак якларыбыз күп, — дип ассызыклады Рөстәм Миңнеханов. — Татарстан — төрле диннәр һәм мәдәниятләр вәкилләренең тыныч яшәвенең яхшы үрнәге»