«Марий ушем» иҗтимагый оешмасының съездында Рамай Юлдашев та чыгыш ясаячак
Иртәгә, 16 декабрьдә Йошкар-Олада «Марий ушем» (Мари берлеге) гомумроссия иҗтимагый оешмасының беренче съезды узачак. Анда Йошкар-Олада яшәүче татар активисты Рамай Юлдашев та чакырылган кунак буларак чыгыш ясаячак.
«Йошкар-Олада бер мари классы да юк. Волжскида да, Козьмодемьянскида да юк. Бүгенге вәзгыятьтәге кануннардан файдаланып, мари классларын, татарлар яшәгән урыннарда татар классларын кертү мөмкинлеге турында сөйләргә телим», - диде Рамай Юлдашев.
«Төп темалар - мари халкының социаль-икътисади хәле. Экология яхшы дисәләр дә, ул мәсьәлә борчый. Кадрлар, демография мәсьәләләре. Билгеле, гел күтәрелә торган милли-мәдәни проблемалар. Бу безнең республикалардагы гына түгел, читтә яшәүче мариларны да борчый торган мәсьәләләр», - диде «Марий ушем» иҗтимагый оешмасының җитәкчесе Владимир Козлов.
Рамай Юлдашев 2004 елдан бирле «Марий ушем» белән хезмәттәшлек итә.
«Бүгенге вәзгыятьтә мари халкының шундый актуаль мәсьәләләр күтәреп съезд уздыруы - ул батырлык. Мари теле, урманнарны кисәләр, министрлар арасында мари вәкилләре юк - шундый мәсьәләләрне күтәрәләр. Удмурт, коми, мордва иҗтимагый оешмалары тарафыннан бер сүз ишетелми бит. Алар үз мәнфәгатьләре өчен көрәш алып бара», - диде Рамай Юлдашев.
Бу - «Марий ушем» хәрәкәтенең беренче бөтенроссия съезды. Моңа кадәр ул республика, төбәкара съезд буларак үткәрелгән иде. Марий Эл, Удмуртия, Татарстан, Башкортстан, Төмән, Киров өлкәсендә, Мәскәү, Санкт-Петербургта яшәүче мари халкы вәкилләре - барлыгы 150 делегат чакырылган. Владимир Козлов 100 кеше килер дип өметләнүен әйтте.
«Без бит иҗтимагый оешма, бөтен кешенең дә юлга акча түләп, килерлек мөмкинлеге юк», – диде Владимир Козлов.