Яшел Үзәндә җиңел машина белән поезд бәрелешкән - видео
Яшел Үзәндә җиңел автомобиль белән поезд бәрелешкән мизгел видеога эләккән. Социаль челтәрдә чыккан видеоларда күренгәнчә, җиңел машина тимер юлга чыга, аны поезд бәрдерә һәм рельслар буенча этеп бара.
Ведомствода хәбәр итүләренчә, Татарстан транспорт прокуратурасы тимер юлдагы авариядән соң тикшерү башлаган.
Якынча мәгълүмат буенча, бүген иртән Волжская урамындагы тимер юлда тепловоз һәм Hyundai чит ил автомобиле бәрелешкән. Йөртүчене хастаханәгә алып киткәннәр, авария килеп чыгу сәбәпләре ачыклана.
Прокуратурада белдерүләренчә, һәлакәт сәбәпле, шәһәр яны поезды 1 сәгатькә тоткарланган. Авария урынына Татарстан транспорт прокуроры ярдәмчесе, Россия Эчке эшләр министрлыгының Яшел Үзән районы буенча идарәсенең ЮХИДИ хезмәткәрләре килде.