Казан Россиянең бизнес өчен иң уңайлы 10 шәһәре исемлегенә керде
Эшмәкәр һәм стартаперлар өчен иң уңайлы Россия шәһәрләре рейтингында Казан җиденче урынны алган. Исемлек Forbes журналы сайтында урнаштырылган.
«Татарстан башкаласы икътисадында кече һәм урта бизнес өлеше 42,2 процент тәшкил итә. Шул ук вакытта республиканың иң эре 10 сәнәгать һәм энергетика компаниясенең дүртесе — „Казаноргсинтез», „Татэнерго», ТГК-16 һәм Мулланур Вахитов исемендәге Казан химия комбинаты («Нәфис Косметикс») Казанда теркәлгән һәм урнашкан», — дип тасвирлый шәһәрне исемлекне төзүчеләр.
Рейтинг авторлары билгеләп үткәнчә, узган ел Казанның төп капиталына 288 млрд сум инвестиция кертелгән.
«Бизнес-шәһәрләр» унлыгында беренче урынны Краснодар алган, ә икенче һәм өченче урыннарда Көньяк-Сахалинск һәм Төмән урнашкан. Рейтингка Россиянең барысы 30 шәһәре кертелгән.
Элегрәк Россия Президенты Владимир Путин Россия икътисадын торгызу тәмамланды, дип белдергән иде. Хәзер, аның фикеренчә, алга таба тотрыклы һәм озак вакытлы үсеш өчен шартлар тудырырга кирәк.