Татарстанда 15 сәгатькә муниципаль депутатларны сайлауда катнашучылар 32 процент булган
Татарстанда муниципаль депутатларны сайлауларда катнашучы гражданнарның саны көндезге сәгать 3тә 32,09 процент тәшкил итте. Бу хакта республика Үзәк сайлау комиссиясе Телеграм-каналында хәбәр итә.
«Сайлаулар» дәүләт автоматлаштырылган системасы мәгълүматлары буенча, 15.00 сәгатькә Татарстанда муниципаль берәмлекләр депутатларының өстәмә сайлауларында тавыш бирүдә катнашу хокукы булган сайлаучыларның 32,09 проценты килгән», диелгән хәбәрдә.
Бердәм тавыш бирү көне бүген иртәнге сәгать 7дә башланды һәм кичке сәгать 8гә кадәр дәвам итәчәк. 36 муниципалитетта 175 участок ачылды. Аларда 654 күзәтүче бар. Шулай ук 292-84-33 номеры буенча кайнар элемтә эшли, анда гражданнар тавыш бирүгә кагылышлы сораулар белән мөрәҗәгать итә ала.