«Татмедиа» янындагы бульварда «Мин җәйне ничек үткәрдем» күргәзмәсе ачылды
Казанның «Татмедиа» бинасы янындагы Фестиваль бульварында «Татарстан» журналы фотокорреспонденты Александр Ефимовның «Мин җәйне ничек үткәрдем» дип аталган күргәзмәсе ачылды. Биредә фотографның пейзажлар, җәен үткәрелгән чаралар һәм Татарстан буйлап үз сәяхәтләрен сурәтләгән сигез фотосы тәкъдим ителгән.
«Татарстан» журналының баш мөхәррире Татьяна Вафина, сентябрь санында, традиция буенча, редакциянең узган җәйгә йомгак ясаячагын сөйләде. «Безнең журнал ел саен «Мин җәйне ничек үткәрдем» темасына фотоинша яза. Фотограф Александр редакциябезнең иң актив хезмәткәре булып тора. Ул эшләргә һәм күп сәяхәт итәргә ярата торган кеше. Ул бөтен Татарстанны әйләнеп чыкты, милли бәйрәмнәрдә һәм җәйге сезонның төп вакыйгаларында булды», — дип билгеләп үтте мөхәррир.
Фото: © Рамил Гали
Фотограф, аерым алганда, Никольское авылында «Каравон» рус бәйрәмендә әйлән-бәйлән уенын сурәткә төшергән. Автор милли бәйрәмнәрне төшерергә ярата, шуңа алдагы кадрда удмуртларның «Гырон быдтон» мизгелләренең берсе сурәтләнә. Ул анда әзерләнгән 248 килограммлы рекордлы ботканы фотога төшергән.
«Күргәзмә бик матур килеп чыкты! Барыгызга да фотолардан ләззәт алуыгызны, җәйне искә төшерүегезне, кесә телефонын алып, эссе җәйге көннәр фотоларын ачып актаруыгызны телим», — дип билгеләп үтте «Татмедиа» Республика матбугат һәм массакүләм коммуникацияләр агентлыгы җитәкчесе Айдар Сәлимгәрәев.
Фото: © Рамил Гали
Ефимовның башка фотоларында «Питрау» һәм «Мин күкне сайлыйм» бәйрәмнәренең, «Ефәк юлы» ралли чарасының якты мизгелләре сурәтләнгән. Биредә шулай ук янгын булган Йолдыз татар авылы фотолары һәм Байкал күле утрауларының берсендәге нерпаларның нәфис кадры тәкъдим ителгән.
«Татмедиа» янында җәй буе күпләгән чаралар узды. Җәйге сезонны исә без хәзер «Мин җәйне ничек үткәрдем» күргәзмә проекты белән озатабыз. Журнал яхшы күргәзмә оештырган. Кунакларга һәм Казан халкына узып киткән җәйнең гомуми сурәтенә карау кызыклы булыр дип өметләнәм», — диде «Татмедиа» АҖ генераль директоры Шамил Садыйков.
Фото: © Рамил Гали
Экспозицияне «Җәйнең соңгы аккорды» дип аталган фото төгәлли. Ул Республика көнендә Яшьләр симфоник оркестры чыгышы вакытында ясалган.
Александр Ефимов — һөнәри осталык буенча «Абилимпикс» Милли чемпионатының «Фотограф-репортер» номинациясенең берничә тапкыр җиңүчесе. Ул бу хәрәкәттә актив катнаша һәм мөмкинлекләре чикләнгән кешеләргә фотоосталык дәресләре бирә.
Фото: © Рамил Гали
«Минем эшем бик яхшы, туган як буйлап сәяхәтләремдә мин бик күп искиткеч урыннар, табигый хәзинә һәм талантлы кешеләрне күрәм», — дип ассызыклый фотограф.
Чара ахырында кунаклар өчен «Волга-Волга» вокаль-инструменталь ансамбле чыгыш ясады.