«IQRA» проекты җиңүчеләре хаҗга юллама белән бүләкләнде

Китап укуны популярлаштыруга һәм ислам турында белем таратуга юнәлдерелгән «IQRA» бәйгесе өченче тапкыр үткәрелә. Проектны Россия Федерациясе мөселманнары Диния нәзарәте, Мәскәү мөселманнары Диния нәзарәте һәм «Өмет» оешмасы оештыра, дип хәбәр итә Россия Мөфтиләр шурасы.

Өченче конкурсның абсолют җиңүчеләре хаҗ кылуга юллама алды. Икенче урынны яулаган катнашучылар кече хаҗ - гомрәгә, ә өченче урынны яулаучылар Төркиягә китәчәк. Моннан тыш, барлык финалистлар проект партнерларыннан бүләкләр ала.

Җиңүчеләр исемлеген Мөфтиләр шурасы сайтыннан карап була.

Традиция буенча конкурс сайланган китаплар буенча рус һәм кыргыз телләрендә үткәрелә. Китап укыганнан соң катнашучылар онлайн-тест үтә. Аннары максималь санда сорауларга дөрес җавап биргән 100 катнашучы финалга чакырыла. Быел финалистларның хәлиткеч ярышлары берьюлы 4 шәһәрдә: Мәскәүдә, Казанда, Уфада һәм Бишкекта (Кыргызстан) үтте.

Конкурста Башкортстан, Татарстан, Кырым, Красноярск, Мурманск, шулай ук Кыргызстан, Казахстан, Таҗикстаннан 10 меңнән артык кеше катнашкан.

«IQRA» проекты бәйге, ярыш кына түгел. Бу проект ярдәмендә һәрьяклап үсешкә юнәлдерелгән кешеләр җәмгыяте формалашуына без бик шат. Конкурста төрле яшьтәге кешеләрнең катнашуын, хәтта гаиләләре белән дә катнашуын күрү сөенечле. Бу, һичшиксез, җәмгыятьтә уку культурасын саклау эшенә зур өлеш кертә. Икенче яктан, проектның мөһимлеге шунда, ул актив һәм битараф булмаган мөселманнарны берләштерә. «IQRA» конкурсы иганәчеләр һәм партнерлар ярдәмендә үсә, алар түләүсез нигездә юмарт бүләкләр бирә. Аллаһы Тәгалә аларның игелеген кабул итсен!»- ди оештыручылар.