36 яшькә кадәрге IT-белгечләр өчен ипотека займы шартларын йомшарттылар
36 яшькә кадәрге IT-өлкә белгечләре минималь хезмәт хакы күләменә карата таләпләрдән башка гына ташламалы ипотека кредиты рәсмиләштерә алачак. Элегрәк халкы миллионнан арткан шәһәрләрдә әлеге тармак хезмәткәрләренә мондый ярдәм чарасын рәсмиләштерү өчен ай саен – 120 мең, ә башка шәһәрләрдә 70 меңнән дә ким булмаган хезмәт хакы алырга кирәк иде. Бу хакта Хөкүмәтнең матбугат хезмәте хәбәр итә.
Билгеләп үтелгәнчә, таләпләрне йомшарту тагын да күбрәк сандагы IT-өлкә белгечләренә файдалы шартларда торак сатып аларга мөмкинлек бирәчәк. Хәзерге вакытта IT-белгечләр өчен ставка елына 5 процентка кадәр тәшкил итә. Халкы миллионнан арткан шәһәрләрдә яшәүчеләр өчен кредитның максималь күләме – 18 миллион, калган шәһәрләрдә гомер итүчеләр өчен 9 миллион сумга тигез.
РФ Президенты Владимир Путин мәгълүмати технологияләр өлкәсендә эшләүче оешмаларның салымын киметү, ташламалы кредитлар һәм субсидияләр бирү турындагы указны 2022 елның мартында имзалады.