Башкортстанда «Бәлешфест» милли аш-су фестивале була
25 августта Бүздәк авылының спорт һәм ял паркында «БәлешФест-2023» милли аш-су фестивале ачыла. Бәлеш бәйрәме 2017 елдан бирле ел саен үткәрелә, һәр бәйрәм күбрәк кунак җәлеп итә һәм Башкортстанның туристлык брендына әверелгән. Бу хакта «Башинформ» яза.
Оештыручылар хәбәр итүенчә, фестивальдә традицион милли аш-су белән кызыксынучы теләгән һәр кеше катнаша ала. Программада милли ризык әзерләү мастер-класслары, осталар бәйгесе, милли аш-суны тәкъдим итү һәм тәмләп караулар бар. Фестиваль җыр, халык биюләре, уеннар, милли музыка коралларында уйнау белән үрелгән чын милләтара бәйрәм булачак, диелә хәбәрдә.
Бәйрәмгә килүчеләр узган ел урнаштырылган Бәлеш арт-объекты фонында фотога төшә алачак.
Алтынчы тапкыр оештырылучы «БәлешФест» фестиваленең кульминациясе — бәлешне тантаналы рәвештә кисеп, бәйрәм кунакларын һәм катнашучыларын сыйлау булачак, диелә хәбәрдә.