Татарстан Республикасы көнендә Казаннан аэропортка өстәмә поездлар билгеләнә
Шәһәр һәм Татарстан Республикасы көнен бәйрәм итүгә бәйле рәвештә, 30 августта Казан – Аэропорт – Казан маршрутына өстәмә шәһәр яны поездлары билгеләнә. Бу хакта «Содружество» компаниясенең матбугат хезмәте хәбәр итә.
6606 нчы санлы поезд Казаннан Аэропорт станциясенә 22.35 сәгатьтә кузгала һәм 23.04 сәгатьтә барып җитә. Ә 6601 нче санлы электричка Аэропорт – Казан юлына 23.15 сәгатьтә китә һәм 23.44 сәгатьтә барып җитә.
Поездлар ике арадагы бар тукталышларга да туктаячак, дип төгәллек керттеләр матбугат хезмәтендә.
Исегезгә төшерәбез, Татарстан Республикасы һәм Казанда Шәһәр көнен бәйрәм итү кичке программасы 17.00 сәгатьтә «Казан» гаилә үзәге янында башлана. Концертта татар эстрадасының танылган йолдызлары, шулай ук Клава Кока һәм JONY чыгыш ясаячак.
Бәйрәм көнендә Казанда махсус автобуслар йөрү оештырылачак.