Казанның Росгвардия махсус полкында яшь гвардиячеләр хәрби ант кабул итте
Казан махсус моторизацияләнгән полкының саф плацында яшь гвардиячеләр хәрби ант бирде. Бу хакта Росгвардиянең ТР буенча идарәсе матбугат хезмәтенә хәбәр иттеләр.
Тантаналы чарада сафларны яңа тулыландыручы хәрбиләрнең туганнары, якыннары һәм хөрмәтле кунаклар катнашты.
Хәрби частьнең беренче командиры отставкадагы полковник Анатолий Завгороднев ант кабул итү һәр солдат өчен мөһим һәм онытылмаслык вакыйга дип билгеләп үтте.
«Шушы минуттан башлап сезнең һәрберегез Ватанны чын яклаучыга әверелә. Бу югары дәрәҗәне лаеклы йөртегез. Намуслы һәм җаваплы хезмәт итегез. Ватанны һәм сугышчан иптәшләрегезне саклагыз», - диде ул.
Чараның тантаналы өлеше тәмамланганнан соң хәрби часть командованиесе вәкилләре хәрби хезмәткәрләр алдында торган бурычлар һәм Казан полкының данлы традицияләре турында сөйләде.