Россиядә урта белемле айтишникларга армияне кичектерү хокукы бирергә тәкъдим иттеләр
IT-компанияләрнең урта профильле белеме генә булган хезмәткәрләре шулай ук хәрби хезмәттән кичектерү хокукына ия булырга тиеш. Бу хакта Россия Цифрлы үсеш, элемтә һәм массакүләм коммуникацияләр министрлыгы хәбәр итә.
Ведомствода белдерүләренчә, цифрлы технологияләр өлкәсендә зур компанияләр белгечләр җитмәүгә зарлана һәм даими рәвештә мондый тәкъдимнәр белән мөрәҗәгать итә. «Известия» газетасы шул хакта яза.
«Россия технологияләрен һәм программа продуктларын эшләү белән шөгыльләнүче һәр компаниядә югары профильле белеме булмаган кадерле хезмәткәрләр бар», - дип сөйләде ИВК компаниясе генераль директоры Григорий Сизоненко. Армиягә чакырылган очракта аларга алмаш табу кыен булачак, дип өстәде ул.
Россия Цифрлы үсеш, элемтә һәм массакүләм коммуникацияләр министрлыгында хәбәр итүләренчә, IT-тармакның югары белеме булмаган квалификацияле хезмәткәрләрен армиягә чакырылыштан вакытлыча азат итү тәкъдиме белән хатны июньдә үк РФ вице-премьеры Денис Мантуровка җибәргәннәр. Анда шулай ук хәрби хезмәттән азат ителүгә исәп тота алган өстенлекле белгечлекләр исемлеген киңәйтү тәкъдим ителде. Хәзер бу исемлектә 60 атама бар.
Узган елның 19 апреленнән Россиянең аккредитацияләнгән IT-компанияләрнең үз хезмәткәрләренә армиядән кичектерүне дәүләт хезмәтләре порталында рәсмиләштерү мөмкинлеге барлыкка килде. Ул 18 яшьтән 27 яшькә кадәрге хезмәткәрләргә кагыла, алар хезмәт килешүе буенча рәсми рәвештә эшләргә һәм тиешле белгечлеге буенча югары белемгә ия булырга тиеш.