Башкортстанда «Җырлыйк әле!» үзешчән фольклор ансамбльләрнең төбәкара фестивале уза
Башкортстан Республикасының Туймазы районы Төмәнәк авылының «Бабай утары» этнографик музей биләмәсендә шаулап-гөрләп җыр-моң бәйрәме – үзешчән фольклор ансамбльләрнең «Җырлыйк әле» дип аталган төбәкара фестиваль-бәйгесе үтә.
Чарада Бөтендөнья татар хатын-кызлары хәрәкәтенең иҗтимагый координацион советы рәисе, региональ «Ак калфак» татар хатын-кызлары иҗтимагый оешмасы рәисе Кадрия Идрисова катнаша, дип хәбәр итте Бөтендөнья татар конгрессы.
Катнашучыларның һәммәсе дә татар халкының милли йолалары, гореф-гадәтләрен чагылдыручы эчтәлекле тамаша тәкъдим итәчәк. Кунакларга «Сөмбелә бәйрәме», «Кич утыру», «Исем кушу», «Сарыкчылык», «Карга боткасы», «Сабантуй» һәм башка йолаларны күрү бәхете елмая. 13 коллектив арасыннан ГРАН-ПРИ һәм урыннар билгеләнә, диелә хәбәрдә.