Рөстәм Миңнеханов: Сабантуй - дуслык бәйрәме
Сабантуй Россиядә яшәүче төрле халыкларны берләштерә. Бу хакта бүген Әстерханның Три Потока авылында башланган XIII Бөтенроссия авыл Сабан туен ачу тантанасында Татарстан Республикасы Рәисе Рөстәм Миңнеханов хәбәр итте. Республика җитәкчесенең матбугат хезмәте шул хакта яза.
Республика җитәкчесе белән бергә Әстерхан өлкәсе губернаторы Игорь Бабушкин һәм Пермь крае губернаторы Дмитрий Махонин бәйрәм башлануын төп сәхнәдән игълан итте. Концерт Татарстан һәм Әстерхан артистлары башкаруында театральләштерелгән тамашадан башланды. Рөстәм Миңнеханов ике мәдәниятнең үзара бәйләнешен югары бәяләде.
«Сабантуй - дуслык бәйрәме. Ул безне берләштерә, татар, рус, мари, удмурт, керәшен татарларының һәм башка халыкларның бердәмлеген чагылдыра. Без барыбыз да зур Россиядә яшибез», - диде Татарстан Рәисе.
Игорь Бабушкин сүзләренчә, Әстерханда Сабан туен һәрвакыт зурлап билгеләп үтәләр.
«Бу күптән көтелгән вакыйга безнең җирдә яшәүче 140тан артык милләтне бер зур гаилә кебек берләштерә», - диде ул.