Татарстан Мәскәүдәге форумда Россиянең иң яхшы спорт төбәге дип танылды
Татарстан Россиянең иң яхшы спорт төбәге дип танылды. Бүләкләү Мәскәүдә ел саен үткәрелә торган SportB2B Expo&Forum мәйданчыгында узды. Ул илдә спорт индустриясен үстерүгә юнәлдерелгән. Бу хакта Татарстан Спорт министрлыгының матбугат хезмәте хәбәр итә.
Оештыручылар SportFacilities 23 премиясен уздырды. Анда 2022 елда иң яхшы спорт объектларын һәм төбәкләрне билгеләп үттеләр. «Россиянең иң яхшы спорт төбәге» категориясендә Татарстан лауреат булды.
«Россия Спорт министрлыгына республикада физик культура һәм спортны үстерүгә шартлар тудырганга, илкүләм проектлар акчасына заманча спорт инфраструктурасы булдыру турындагы идеяләребезне тормышка ашыру мөмкинлеге өчен дә рәхмәт белдерәм. Һәм, әлбәттә, Татарстан Республикасы җитәкчелегенә һәм безнең Рәисебез Рөстәм Миңнехановка төбәктә спорт үсешенә игътибар биргәне өчен рәхмәт», - диде ТР спорт министры урынбасары Алмаз Хөсәенов.
Россиянең иң яхшы спорт төбәге исемлегендә Татарстаннан тыш, Кемерово, Мәскәү, Мәскәү өлкәсе, Краснодар һәм Пермь крайлары бар.