Бердәм ачык ишекләр көнендә Татарстан укучылары ихтыяҗ булган һөнәрләр турында белә ала
22 апрельдә Татарстанда «Профессионалитет» федераль проектының Бердәм ачык ишекләр көне уза. Укучыларны ихтыяҗ булган һөнәрләр белән таныштыруга юнәлтелгән чаралар комплексы планлаштырылган.
«Бердәм ачык ишекләр көнендә ата-аналар җыелышы, сыйныф сәгатьләре, республиканың зур компанияләренең укыту остаханәләре базаларында интерактив экскурсияләр була», - дип билгеләп үттеләр Татарстан Мәгариф һәм фән министрлыгы матбугат хезмәтендә.
Татарстанда федераль проектта Алабуга политехника көллияте, Чаллы политехника көллияте, Әлмәт политехника техникумы һәм Кукмара аграр көллиятенең белем бирү-җитештерү үзәкләре катнаша.
«Профессионалитет» федераль проекты Россия Мәгариф министрлыгы инициативасы белән эшли башлады. Ул бизнес һәм көллиятләрнең үзара хезмәттәшлегенә нигезләнгән. Предприятиеләр мәгариф учреждениеләре белән партнерлык идарәсендә катнаша һәм практика өчен җитештерү базасын тәкъдим итә.