Нурлатта яшәүче күпбалалы ата контракт белән хәрби хезмәткә китәргә җыена
Нурлатта яшәүче күпбалалы әти Фәнил махсус хәрби операциягә китәргә боерык көтә. Кичә ул хәрби комиссариатка контракт буенча хезмәткә керешү турында гариза язган.
«Балачактан хәрби булырга хыялландым, әмма килеп чыкмады. Армиядә калырга теләгән идем, ике тапкыр Әфганстанга, аннары Чечняга җибәрүләрен сорап рапорт яздым, булмады. Менә өченче тапкырдан хәл ителде! Бу уйланылган адым. Кирәк икән, хезмәт итәчәкмен. Ир-атларга качу килешми. Безнең бабайлар безне саклаган, 41нче елда беркем дә качмаган. Димәк, безнең язмыш шундый. Дошманны юк итәргә кирәк. Аякта басып торганда артка чигенү юк» - диде Фәнил.
Фәнилнең гаиләсе, өч баласы, өч оныгы бар. Гаилә башлыгының карарын тыныч кабул иткәннәр. Хәл иткән икән — шулай булачак.
Нурлатта Фәнил белән контракт буенча хезмәткә алынган тагын 9 хәрби алгы сызыкка җибәргәнне көтә.