Актанышта иң яхшы мәктәп ашханәсе ачыкланды
4-5 апрельдә «Иң яхшы мәктәп ашханәсе» конкурсының район этабы үткән иде. Конкурс таләбе буенча һәр мәктәп 2 атналык менюның бер көнлек ризыгын әзерләп күрсәтергә тиеш иде.
Дөрес туклануны пропагандалау, укучылар, әти-әниләр, укытучылар белән эшчәнлек, ашханә белән азык-төлек әзерләү блогының санитар чисталыгы, мәктәп сайтларында көндәлек менюның куелышы, барлык норматив документлар да тикшерелеп исәпкә алынды. Бәйгедә 15 мәктәп катнашты. Бу хакта Актаныш муниципаль районының матбугат хезмәте хәбәр итә.
Бәйге нәтиҗәләре буенча, урта мәктәпләр арасында Актанышның 2нче урта гомуми белем бирү мәктәбе һәм төп гомуми белем бирү мәктәпләре арасында Такталачык мәктәбе җиңүче дип табылды, аларның эшләре бәйгенең Республика этабына җибәреләчәк.
Район башлыгы Ленар Зарипов бәйгедә катнашучыларны мәктәп һәм балалар бакчалары җитәкчеләре катнашындагы традицион киңәшмәдә тәбрикләде.